Cebuano News: Pagbansay alang sa Plant! Plant! Plant! project, gisugdan na

DAKBAYAN SA BUTUAN, Hunyo 3 -- Gisugdan na ang serye sa mga pagbansay sa pag-uma nga kinahanglang agian sa tanang mag-uuma nga apil sa “Mapadayonong Tisuk” o kadtong apil sa padayong kampanya sa pagtanum ubos sa Plant! Plant! Plant Project sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba. 
 
Apil sa mga pagbansay nga unang gihimo sa Simbalan, Buenavista mao ang Farm Planning ug Good Agricultural Practices (GAP). Apil sa maong pagbansay ang mga representante sa mga organisasyon sa mag-uuma gikan sa Benavista ug Las Nieves.

Himoon usab ang maong mga pagbansay sa ubang mga lungsod ning semanaha.
 
Gipunting nga tamnan sa priority crops – abaca, saging, kape, cacao, manga ug uban pang prutas, lubi, bulanghoy, rubber ug commercial trees – ubos sa AGUSAN UP! ang 125,000 ektaryas hangtud sa 2027. Mokabat sa 5,000 ektaryas ang tamnan niing tuiga ug sugdan kini karong Hunyo 12.
 
Kaabag sa AGUSAN UP! Coordinating Center sa maong pagbansay ang personahe sa buhatan sa Provincial Agriculture Office (PAO) nga si Jim Razonabe isip guest speaker.

Gipaambit niya ang iyang kaalam sa representante sa 15 ka mga organisasyon ang husto nga preparasyon sa dili pa magsugod og pananom. (Karen Decamotan with reports from Jessa Mindajao, LGU Agusan del Norte/PIA Agusan del Norte)



Source: Philippines Information Agency (pia.gov.ph)

Post a Comment

0 Comments