Hiligaynon News: PSA Iloilo naglapaw sa target para sa nat'l ID registration

SYUDAD SANG ILOILO, Mayo 26 (PIA) - - Nakarehistro ang Philippine Statistics Authority (PSA) – Iloilo sang kapin 834,155 ka mga Ilonggo para sa Philippine Identification System (PhilSys) ukon National ID tubtub sang Domingo, Mayo 23.

Ginpahayag ni PSA-Iloilo Director Nelida Amolar nga ang numero naglapaw sang 15.88 porsyento sa 701,631 Ilonggos nga target igarehistro sa PhilSys sa syudad kag probinsya tubtub Mayo 31 sini nga tuig.

Sa 834,155 ka mga nagparehistro, kapin 188,075 ang nagikan sa syudad sang Iloilo.

Ginpasalamatan ni Amolar ang mga lokal nga panguluhan, pribado nga sektor kag iban pa nga tagsakdag sa suporta nga ginhatag sa pagpatigayon sang seamless nga rehistrasyon sa syudad kag probinsya sang Iloilo.

Gindayaw man sini ang registration team kag mga punong barangay sa ila pagpanikasog kag kooperasyon nga nakabulig sa positibo nga resulta sang rehistrasyon ginalakipan sang mga residente sang barangay sa nagkalain lain nga mga munisipyo sa probinsya.

Sa karon, may yara nga 42 ka mga registration center nga gin-establisar sa Iloilo - 35 sa mga nagkalainlain nga lokal nga panguluhan sa probinsya kag pito sa syudad.

Ginpahamtang ang pito ka registration centers sa syudad sa Iloilo City Malls sa Ungka kag Tagbak sa distrito sang Jaro; Molo gym; Arevalo gym; San Rafael gym sa distrito sang Mandurriao; Iloilo Science and Technology University sa distrito sang Lapaz; kag Midtown Hotel sa distrito sang City Proper.

Suno kay Amolar, ang pito ka mga registration center ang temporaryo nga sarado bangud ang syudad ang ginpaidalum sa Modified Enhanced Community Quarantine (MECQ) tubtub Mayo 31, 2021 tuga sang coronavirus disease 2019.

Santo sa Executive Order No. 041 nga ginpaguwa ni Mayor Jerry Treñas nga nagpahamtang sa syudad sa idalum sang MECQ status ang mga pagtililipon sa gwa sang puluy-an ang ginadumilian kag ang mga pagtililipon para sa kinahanglanon nga serbisyo ang ginapahanugutan lamang sa nahinambitan nga tion.

Gindugang ni Amolar agud nga mangin mas accessible sa mga Ilonggo magabukas sila sang dugang nga mga registration center sa duha ka malls diri sa Hulyo.

“Ang mobile registration sa SM City Iloilo nagsugod na apang nagaserbe pa gid lamang ini sa mga tinawo kag tenants sang mall, buksan namon ini sa mga online registrants kag walk-ins sini nga Hulyo,” pahayag ni Amolar.

Ang nagapadayon nga PhilSys registration bukas sa tanan nga mga Filipino 15 anyos pataas kag sila ang ginakinahanglan nga magpresentar sang isa ka valid ID kasubong sang Professional Driver’s License, DFA-issued Philippine Passport ukon ePassport kag GSIS ukon SSS-issued Unified Multi-purpose Identification Card (UMID), kag iban pa sa tion sang rehistrasyon.  (JSC/laf/PIA6 Iloilo)

 

 

 



Source: Philippines Information Agency (pia.gov.ph)

Post a Comment

0 Comments