Cebuano News: Skills development ug livelihood programs gilusad sa Zapanta Valley

DAKBAYAN SA BUTUAN, Mayo 27 -- Gilusad sa probinsya sa Agusan del Norte ug sa Technical Education and Skills Development Authority (TESDA) kagahapon, Mayo 26, ang nagkalain-laing skills development and livelihood programs aron mahimong sustenidong kasandigan sa panginabuhian sa mga residente sa Zapanta Valley, Bangayan, lungsod sa Kitcharao.
 

Sa maong okasyon nausa usab ang tulo ka organisasyon nga mag-inambitay sa unsa man ang mahimong ayuda sa gobyerno ug hiniusang palamboon kini alang sa kabulahanan sa tagsa-tagsa nila ka sakop.
 
Ang maong mga organisasyon mao ang mosunod: Zapanta Valley Manobo Mamanwa Association (ZAMMA) nga girepresentahan sa chairman nga si Datu Lando Anlagan, Zapanta Valley Bisaya Organization (ZAVBIOR) nga girepresentahan sa chairman nga si Jerry Espanola ug ang Zapanta Valley Farmers Association (ZAVAFA) nga girepresentahan sa chairman nga si Anacleto B. Masangkay III.
 
Unang giambitan sa tulo ka organisasyon kaganiha ang pagtanum sa ilang tagsa-tagsa ka luna sa inisyal nga 2,000 ka seedlings sa abaca ug mga prutas. Inisyal nga nasabutan sa mga organisasyon nga hiniusa nilang tamnan ug abaca ang mosuma sa 100 ka ektarya.
 
Gisugdan usab kaganiha sa TESDA ang Cake Making Training.
 
Gipahibalo usab ni TESDA Provincial Director Rey Cueva nga masugdan na sa bulan sa Hunyo ang mga gipang-commit sa iyang buhatan nga trainings sama sa carpentry ug masonry ug uban pang mga pagbansay. 
 
Dugang ni Cueva nga ongoing na usab ang procurement alang sa mga equipment sa bakery, habal-habal mini spareparts store, barbershop ug beauty parlor.
 

Ubos usab sa AGUSAN UP!, ang kampanya sa pagpalambo sa administrasyon ni Gobernador Dale Corvera kaabag ang buhatan ni Kongresista Angel Amante-Matba, laing gatusan ka ektarya usab ang una na’ng nasabutan tali sa mga mag-uuma tamnan og nagkalain-laing high value crops sa mosunod nga pito ka tuig ug sugdan na kini sa Hunyo.
 
Ubos gihapon sa AGUSAN UP!, apil ang mga mag-uuma sa Zapanta Valley sa ilusad sa ikaduhang semana sa Hunyo ang gipasiugdahan sa Provincial Agriculture Office (PAO) nga “Vegetable Derby”, indigay sa mas produktibong gulayan sa upat ka mga areas sa probinsya, butang nga mobansay sa mga mag-uuma niini aron mahimong hanite sa produksyon sa gulay.
 
Dungan sa maong vegetable derby ang paghimo sa mga residente nga kabahin sa mag-uuma nga mo-develop ug mo-sustiner isip kasandigang ekonomikanhong tinubdan sa una nang nalatid nga hiniusang proyekto sa mga mag-uuma og gulay sa Kitcharao, sa munisipyo ug sa probinsya nga mao “Food Basket.”
 
Ubos sa “Food Basket” ipalambo ang 500 ektaryas nga gulayan sa tibuok probinsya (labing daku niini sa Kitcharao), mopahiluna og Bagsakan ug Mobile Marketing Units, ingon man ang pagmugna og vegetable processing center. 
 
“Karon, atong paningkamotan nga mahimong vegetable capital ang zapanta valley sa Kitcharao ug sa Agusan del Norte” sumala ni Provincial Administrator Gerry Joey S. Laurito isip mensahe ni Gob. Corvera.
 
Sa iyang mensahe, gihangyo sa Barangay Kapitan sa Bangayan nga si Joseph V. Senones ang tanang lumulupyo sa Zapanta Valley nga amomahon ug ampingan ang mga proyekto nga gipadangat sa gobyerno aron mas molambo ang ilang lugar ug mabulahan ang mga tawo niini.
 
Isip tubag mikometer ang mga lider sa tulo ka organisasyon sa mga panawagan sa panaghiusa ug pagpalambo sa gipadangat nga mga proyekto sa gobyerno.  
 
Apil usab sa mitambong sa maong okasyon si Dr. Raul del Agua, Municipal Administator ug Municipal Agriculturist sa Kitcharao isip representante ni Mayor Aristotle Montante, TESDA PTC Administrator Engr. Ruben Carduza, Sr., Major Roger Gersava sa 29th Infantry Battalion, PLTCol. Ritchie Yatar sa PNP.
 
Mitambong usab sila si Wendilin Abuloc sa PhilFIDA, nga maoy mipadangat sa mga seedling sa abaca, mga personahe sa AGUSAN UP!, sa Provincial and Social Welfare Development Office [PSWDO], Provincial Agriculture Office ug Municipal Agriculture Office. (Shena Mae Pabia ug Ydhel Brando Zagado, LGU Agusan del Norte/PIA Agusan del Norte)



Source: Philippines Information Agency (pia.gov.ph)

Post a Comment

0 Comments