Cebuano News: Rapid Antigen Test dawaton na isip suporta sa hupas nga RT-PCR

CORTES, Bohol, May 26 (PIA) -- Sa labing bag-o nga liskuhag sa pamaagi aron makasulod ang usa ka tawo gikan sa gawas sa lalawigan, gi-usab na usa ang Bohol Executive Order 17 series of 2021 ug Executive Order 17-A series of 2021.

Pinaagi sa Bohol Executive Order 28 series of 2021, gitugotan na nga makapresentar og negatibo nga resulta sa coronavirus disease (COVID) pinaagi sa Rapid Antigen Test (RAT) ang mga mosulod sa Bohol.

Hinuon, kini magamit lamang kanila nga una na nga nakapasa sa negatibo nga resulta sa COVID pinaagi sa Reverse Transcription Polymerase Chain Reaction (RT-PCR) ug nalapas na o hupas na sa 72 oras tungod sa dili kapugngan nga kakuli-an.

Sa EO 28 nga gipagawas ni Gobernador Arthur Yap niadtong Mayo 23, 2021, mibutyag nga ang mahimong mosubmitir sa negatibo nga RAT kadto lamang una nga nakaduso sa negatibo nga RT PCR apan natanggong gihapon kay nakanselar ang byahe sa barko ug eroplano dala sa dautang panahon ug uban pa'ng dili matagna nga hitabo.

Niini, segun sa EO 28, mahimo sila nga makasakay sa sunod nga mga byahe sa barko ug eroplano basta makapakita og negatibo nga RAT results nga nakuha sulod sa 24 oras sa pagbyahe, uban usab sa swab results sa RT PCR nga wala pa molapas sa 7 ka adlaw gikan sa pagbyahe.

Kahinumduman nga niadtong Marso 3, 2021, gipagawas sa gobernador ang EO 17 nga naglagda sa pagtangtang na sa Repeat Testing, Medical Certificate ug sa PNP COVID Shield Travel Authority isip mga mahinungdanong dokumento aron makasulod sa Bohol.

Paglabay sa usa  ka semana, gipagawas na usab ang EO-17-A aron hingpit na nga matangtang ang rekisitos sa Testing Upon Arrival isip gikinahanglan aron makasulod sa Bohol ug ang pagpasabot nga ang rekisitos nga gikatid, dili kinahanglan sa mga 4 anyos paubos.

Dugang sa bag-ong EO 28, may mga higayon nga ang mga byahedor paingon sa Bohol nga magbarko o mag eroplano, nakakuha na unta sa saktong dokumento sa pagpauli sama sa negatibo nga RT PCR apan  tungod sa bagyo ug ubang hinungdan, gikanselar sa kompanya sa barko ug eroplano ang byahe.

Nakita sa gobernador nga mag gastoso kon pangayoan na usab sa RT PCR ang mga pasahero nga may nakanselar nga byahe, mao nga ang medyo barato nga RAT results  nga nagpakitang negatibo sa COVID ang mosakay, pwede na nga gamiton.

Sa pagpanukiduki, ang RT PCR test nagkantidad na sa P3,500 sa mga pasilidad nga iya sa goberno samtang mahimong mosaka kini  kon adto sa pribado nga mga pasilidad kuhaon ilabi na kon nagdali ang mobyahe.

Sa laing bahin, ang RAT, mahimong makuka sa pipila ka minutos ngadto sa pila ka oras ug nagkantidad og tag P1,300 ngadto sa P1,800. (rahchiu/PIA-7/Bohol)



Source: Philippines Information Agency (pia.gov.ph)

Post a Comment

0 Comments