Cebuano News: 8 namatay sa 23 ka adlaw, pagpabakuna subli giaghat

CORTES, Bohol, May 23 (PIA) -- Subli nga gipanawagan sa mga tinugyanan sa kasanihan ngadto sa mga nagduhaduha pa gihapon sa pagpabakuna sa pagsalig sa siyentipiko nga mga pagtuon kabahin sa bakuna kay sa mga dungog-dungog lamang aron himoon ang isyu sa pagpabakuna nga pamolitika.

MAS NASAYUD. Sila nga mga BHERTS sa usa ka barangay sa Bohol nagpakita sa ilang mga binakunahan nga mga bukton sa pag-aghat sa mga nagduhaduha pa nga magpabakuna na, sangliy kini ubanan sa dugang proteksyon, magpalikay sa grabe nga pagkasakit sa COVID-19. (Tampo nga hulagway)

Ang pagpabakuna, ubanan sa saktong pagbansay sa pagsul-ob sa face mask, face shields, pagpanghunaw permi ug  ang paglikay sa mga lugar nga may daghan nga tawo ug  ang pagbansay sa usa  ka metros nga kalay-on sa imong gika-estorya na pruwebahan na nga maoy labing maayong personal nga panalipod batok sa coronavirus disease, segun pa sa Department of Health (DOH).

Ang panawagan gipalanog usab dungan sa namatikdan nga paglisud sa mga vaccination teams nga aghaton ang mga nakakuha sa unang tupokan sa bakuna sa pagbalik alang sa ikaduha nga tupok.

Gawas lamang sa Janseen nga bakuna nga iya sa Johnson ang Johnsons, ang kasagranag bakuna nga makuha sa Pilipinas, magkinahanglan sa duha  ka tupokan, nga gikan sa 21 ka adlaw nga lat-ang gikan sa una  nga pagtupok ngadto sa 12 ka semana, segun sa matang sa bakuna.

Ang kamahinongdanon sa pagpabakuna, gipasamotan pa sa kamatuoran nga sa buwan sa Mayo, dinhi sa Bohol, walo na ang kinabuhi nga nakalas sulod sa 23 ka adlaw pa lamang, segun sa kasayuran nga gipaambit sa Bohol InterAgency Task Force on the Management of Emerging Infectious Diseases.

Kini human duha  ka Bol-anon ang gikataho nga namatay tungod sa COVID niadtong Biyernes, Mayo 21.

Sa kinatibuk-an, gikan sa Marso 16 2020 ngadto sa Mayo 21, 2022 o usa   ka tuig duha  ka buwan ug  6 ka adlaw, o 402 ka adlaw, 48 na ka kinabuhi ang naangin sa nahisgutan nga sakit nga hilabihan ka mananakod.

Gikan sa average nga tulo ka kamatayon sa  matag buwan, kini gipausab sa labing bag-o nga trend diha nga walo na ang namatay sa usa  ka buwan lamang.

Gani, kini nga datus,  nagpakita sa nagkadaghan sa namatay sa nagsunod na nga mga buwan.

Dala niini, mas gipalanog karon ang aghat sa pagpabakuna, bisan pa nga gipasalig sa mga tinugyanan sa DOH nga ang tanang bakuna, miagi sa tukma nga pagtuon, pagsuway sa  ka epektibo niini ug sa kapasidad niini nga mopalanat sa panalipod ngadto sa tawo. (rahc/PIA-7/Bohol)



Source: Philippines Information Agency (pia.gov.ph)

Post a Comment

0 Comments