Cebuano News: 60% na sa Bohol HCW frontliners nakakompleto sa 2 ka bakunahan

CORTES, Bohol, May 20 (PIA) -- Sobra na sa katunga sa 42,949 ka mga makalista nga Medical ug Health Care Workers ang nakakuha na sa sa una ug ikaduha nga tupokan sa bakuna nga SinoVac ug AstraZeneca.

HAPIT NA MATIKOP. Naa na sa 60% ang mga naabut nga hcw ug medical frontliners sa Bohol dayun mosunod na ang ubang priority groups, segun sa BIATF. (PIA Bohol)

Kini segun sa taho sa Bohol InterAgency Task Force on the management of Emerging Infectious Disease nga gipagawas Mayo 20, 2021.

Gamit ang mga kasayuran nga gikan sa Provincial Health Office (PHO) diin nagbase usab ang Provincial Vaccination Operations Center (PVOC) nga mga natigum nga datus hangtud Mayo 17, 2021.

Subay sa lagda sa National Vaccine Roll-out, gipahimutang ang mga Medical ug Health Care Workers isip angay hatagan sa prayoridad tungod kay sila mismo ang nagsabak sa mga masakiton ug mas daku ang posibilidad nga sala ang unang matakdan.

Sila karon ang anaa sa Priority Group A1.

Segun sa PHO, miabut na sa 60 porsyento sa tanan nga angayan nga mabakunahan sa Priority Group A1 ang nakakompleto na sa ilang una ug ikaduha nga tupokan sa bakuna ng maoy manalipod katinga sa pagtakod ug pagkasakit nga molahus ngadto sa pagkagrabe.

Sa taho, sa unang distrito, miabut na sa 15,023 ka mga priority health care workers nga naa sa frontlines ang nabakunahan na.

Nag-una sa labing daghan nga nabakunahan sa distrito ang Tagbilaran City nga may dul-an na sa 6,700 ka frontliners ang nabakunahan.

Kini naglangkob sa 4,700 sa unang dose ug 1,900 sa ikaduhang dose.

Kini gisundan sa Loon nga may 1,550 na, 1,050 niini sa unang dose ug 500 sa ikaduhang tupokan.

Ang Calape maoy ikatulo nga may dul-an sa 600 sa unang tupokan ug 300 sa ikaduhangtupokan sa bakuna.

Sa ikaduhang Distrito, 11,649 na usab ka mga medical ug HCW nga anaa nagtrabaho sa frontline ang nahatagan sa bakuna.

Nag-una niing ang Ubay nga may 1450 nga nahuman na sa unang dose ug 900 sa ikaduhang dose.

Kini gisundan sa Inabanga nga may 850 na ang nakakuha sa unang dose ug 700 kapin sa ikaduhang dose, dayon ang Talibon nga may 800 sa unang dose ug kapin sa 300 nabakunahan sa ikaduhang dose.

Sa ikatulo nga Distrito, anaa na sa 13,083 ang nabakunahan sa Sinovac ug Astrazeneca.    

Jagna pa gihapon ang nag-una sa mga kalungsuran sa ikatulong Distrito, nga may 1200 ang nakakuha sa unang tupok ug 500 sa ikaduhang tupok.

Kini gisundan sa Valencia nga may 600 na nga nakakuha sa unang dose ug 300 nga nakakuha sa ikaduha nga dose.

Sunod na dayon ang carmen nga may 500 kapin ang nkakuha sa unang dose ug laing 300 kapin sa ika duha nga dose.

Segun sa BOATF nga migamit sa kasayuran gikan sa PHO, mikabat na sa 70,020 ka doses sa bakuna ang nadawat sa Bohol, ug sa 39,756 ka HCW nga natupokan, miabut na sa 85.2 porsyento ang vaccine consumption sa Bohol. (rahc/PIA-7/Bohol)



Source: Philippines Information Agency (pia.gov.ph)

Post a Comment

0 Comments