Oil spill sa Jasaan giaksyunan gilayon sa PENRO

MISAMIS ORIENTAL, Abril 15 - Paspas nga miaksyon ang buhatan sa Provincial Environment and Natural Resources (PENRO) human nadawat ang report niadtong Abril 3 ning tuiga nga adunay usa ka oil spill sa Macajalar Bay sa lungsod sa Jasaan, Misamis Oriental.

Sa pagsunod sa mando ni Gobernador Bambi Emano nga respondihan gilayon ang bisan unsa nga mga insidente deretsong mibyahe sa lugar, gisuta ug giinspeksyon mismo ni PENRO Head Engr. Prisco Valmoria ug dinhi iyang nahibaloan nga ang oil spill nagikan sa naunlod nga M/V Tower One kon diin nakaangkla kini duol sa Philippine Iron Construction and Marine Works (PICMW).

Nasayran nga samtang naghulat og plano sa pagpa-ayo niini mao sab og pagka-unlod sa barko nga maoy hinungdan nakabubo og mokabat 3 ngadto 4 ka tonelada sa oil sa dagat.

Upat ka mga barangay ang una nga naapektuhan niini nga gilangkoban sa Barangay Solana, Lower Jasaan, Kimaya ug Luz Banzon gumikan sa maong barangay nipaingon ang sea current nga nagdala og oil spill nga gikabalaka nga maapektuhan sab ang mga mangroves sa nasangpit nga mga dapit.

Ang PENRO, Philippine Coast Guard (PCG) ug mga barangay officials gikan sa mga apektadong lugar nagkahiusa sa paghimo og lakang aron mapugngan ang oil spill sa lugar.

Ang PCG dili pa makasulti sa kasamtangan nga hinungdan sa pagkaunlod sa barko samtang ang buhatan sa Bureau of Fisheries and Aquatic Resources (BFAR) naghimo sab og imbestigasyon ug nag report nga walay fish kill nga natala.

Agi og tubag nga dili na mokaylap ug makadala og kadaot ang oil spill ang PCG diha dayon nag-instalar og oil spill booms, usa ka temporary floating barrier nga gigamit aron ma-contain ang oil spill, masala ug maminusan ang posibilidad sa paghugaw sa mga baybayon.

Gibutyag sa residente sa dapit nga si Ms. Marilou Legazpi nga naghatod og kahugaw sa baybayon ang oil spill.

“Ang oil spill ato, mao gyud ang naka kuan diri sa baybay hugaw gyud kaayo. Pati gani sa fish cage karon naa makitang oil. Ang among gidepensahanan ang fish cage karon kay naay isda," sulti niini.

Sa iyang bahin ni Engr. Valmoria iyang gipaabot nga deretsong naaksyunan ang oil spill hinungdan sa pagkakaron kontrolado na kini.
Gibutyag sab niini ang mga lakang nga gihimo sa mga opisyales sa kabarangayan.

"Ang atong mga barangay officials gani nag hire sila og mga tao gikan ra pud sa ilang barangay, sa mga tao nga motabang og clean up kay ang gihimo nila, ilang gikalos ang oil nga naa ra sa ibabaw sa tubig gibutang sa drum," matud ni Engr. Valmoria.

Gibutyag sab niini nga nag-inisyatiba usab ang mga barangay nga magbutang og sawdust nga gipanghulog sa baybayon aron mo-absorb ug mopilit ang oil. Lakip sa lakang nga ilang gihimo mao ang sanga sa kahoy nga naay mga dahon nga gibutang sa apektado aron mopilit ang oil.

Gipahibalo usab sa PCG ngadto kanila nga under control na ang oil spill.

"Under control na gyud ang oil spill, in fact na limpyo na ang atong dagat pero nagpadayon gihapon sila kay dili paman gyud totally clear ang tubig. Pero dili kabalak-an kay under control na.” pahayag niini.

Sa kasamtangan nagkuha na og water sampling ang Environmental Management Bureau sa mga lugar nga apektado samtang ang BFAR nagkuha sab og oil sampling aron mahibaloan ang kadaot ilawom sa tubig apan sa pagkakaron ang duha ka mga buhatan nagpaabot pa sa resulta niini. (PIO MisOr)



Source: Philippines Information Agency (pia.gov.ph)

Post a Comment

0 Comments