Cebuano News: Saba nga tambutso gidili na sa Carmen

DAKBAYAN SA BUTUAN, Abril 24 -- Mipakanaog og regulasyon ang lungsod sa Carmen, Agusan del Norte, sa operasyon o paggamit og modified muffler pinaagi sa Municipal Ordinance No. 67-2020 nga gideklarar nga balido sa Sangguniang Panlalawigan atol sa ika-84 nga sesyon regular kaniadtong Abril 6.

Ang maong municipal ordinance gipangamahanan ni Sangguniang Bayan Member Julius S. Tamayo.

Nakita sa Committee on Laws, Ethics, and Good Government nga gipangunahan ni Provincial Board Member James T. Reserva, nga ubay-ubay nga nanag-iya og sakyanan nga unregulated ang paggamit sa mga motorsiklo diin tangtangon ang silencer o otrohon ang tambutso hinungdan nga makahatag kini og mas kusog nga kasaba o tingog.

Aron mapadayon ang kalinaw ug kaayohan sa tanang katawhan hingpit nga gi-regulate sa Carmen ang paggamit o pag-ilis sa muffler sa ilang sakyanan.

Ang makit-an nga makalapas sa maong balaod pagamultahan og lima kagatos (P500) ka pesos alang sa unang opensa, usa ka libo (P1,000.00) ka pesos sa ikaduha ug duha kalibo ug lima kagatos (P2,500.00) ka pesos ug pagkompiska sa motor sa sunod-sunod nga pag lapas niini.

Gikan sa pag kompiska sa motor vehicle with modified muffler dugang P100.00 matag adlaw ang idugang nga silot isip impounding fee.

Ubos sa maong ordinansa, gitagaag responsibilidad ang tanang sellers, retailers ug repair shops owner o manager sa pagpahinumdom sa matag customer nga adunay ordinansa nga gimugna para sa mopalit og tambutso.

Gidili usab sa lungsod sa Carmen ang pagpamaligya og open-typed-mufflers, branded man kini o dili.

Isip kabahin sa implementasyon sa ordinansa, ang Carmen Municipal Police Station ug Municipal Security Task Force (MTSF) gitahasang maoy modakop sa violators. (SV Deligero, LGU Agusan del Norte/PIA Agusan del Norte)



Source: Philippines Information Agency (pia.gov.ph)

Post a Comment

0 Comments