Cebuano news: Pinaka-unang pampublikong Dialysis Center sa Bukidnon gibuksan

MALAYBALAY CITY, Abril 9 (PIA)--Gibuksan na ang pinakaunang pampublikong Hemodialysis Center nga nahimutang sa Bukidnon Provincial Medical Center (BPMC) ning adlaw’ng Miyerkules, Abril 7.

Sa gipahigayon nga ‘Inauguration’ sa Dialysis Center nga gipangunahan ni Senator Juan Miguel Zubiri, iyang gibutyag nga gitukod kini agi’g suporta sa pioneering nga Provincial Indigency Health Program sa Bukidnon aron mahatagan sa accessible nga serbisyo medikal ang mga kabus.

“Dili ni namo mahimo kung dili tungod sa akong igso-on nga si Congressman Manoy. Siya gyud ang nag suggest ani nga kung pwede mabutangan gyud ang Bukidnon ug Dialysis Center para sa atong mga igso-on nga walay ika-gasto sa ilang dialysis," matud ni Senator Migz Zubiri.

Mikabat sa P10 Million ang kantidad sa pito (7) ka mga yunit sa Dialysis Machine nga andam magamit sa mga taga-Bukidnon nga labing nanginahanglan.

Dugang ni Senator Zubiri nga sugod palang kini kay matud niya, iyang i-apil sa budget para sa tuig 2022 ang pagbutang ug Dialysis Center sa tulo ka ‘public hospitals’ nga nahimutang sa mga lungsod sa Manolo Fortich, Maramag ug Kibawe.

Sa kasamtangan, dako ang pasalamat ni 3rd Distric Representative Manuel ‘Manoy’ Zubiri kang senator Zubiri sa pagtubag sa hangyo sa katawhan sa Bukidnon.

"Mapasalamaton ako kang Sen. Migz sa pagtubag sa atong hangyo nga magbutang og Dialysis Center dinhi sa Bukidnon tungod kay daghang mga tawo ang ga-duol kanato nga nangayo ug tabang. Sila ang mga pasyente nga nanginahanglan og Dialysis apan wala’y igong salapi aron maka-dialysis sa pribado nga mga ospital. Kini ang usa sa atong mga pangandoy nga natuman na gyud karon. Pinaagi niini nga Dialysis Center, matabangan nato ang kadaghanan sa atong mga katawhan sa Bukidnon nga malugwayan ang ilang kinabuhi," matud ni Cong. Zubiri.

Mahinumduman nga usa kining Dialysis Center sa mga nakahan-ay nga gihisgutan sa mga kadagko-an sa Probinsya atol sa gipahigayon nga Anti-Poverty Summit didto sa Hotel Susana sa Valencia City mga pipila ka tuig na ang milabay.

Kauban sa Senador atol sa “Ribbon-cutting ceremony” sila si 3rd District Cong. Manuel Zubiri; BPMC Chief Dr. Miguel Antonio Prantilla; Department of Health (DOH) Regional Director Dr. Jose Llacuna, DOH Bukidnon chief Dr. Vincent Raguro; ug former BPMC chief Dr. Sulpicio Henry Legaspi. (BGE/PIA Bukidnon)



Source: Philippines Information Agency (pia.gov.ph)

Post a Comment

0 Comments