Cebuano News: DOH may pahinumdom sa pagdagsa sa mga community pantries

Gibuksan ang Bohol Community Pantry sa Diocese sa Tagbilaran niadtong Abril 22.  Nahimutang kini sa St. Joseph The Worker Cathedral sa syudad sa Tagbilaran diin libreng gipanghatag sa sa mga kabus nga apektado sa COVID-19 ang mga pagkaon sama sa bugas, itlog, mga instant noodles, mga utanon ug prutas. (Bishop Abet/Diocese of Tagbilaran FB)

TAGBILARAN CITY, April 23 (PIA) -- May pahinumdom ang Department of Health (DOH) sa pagdagsa sa mga community pantry sa nagkalain-laing dapit sa nasod.

Matud pa sa tigpamaba sa DOH nga si Usec. Ma. Rosario Vergeire, maayo ang mga gihimo sa mga community pantry nga nitabang sa mga nanginahanglan karong may pandemya.
 Apan matud pa niini nga kinahanglan pa gihapon kining bantayan aron masiguro nga dili kini pamultahon sa pagtakod-takod sa coronavirus disease (COVID-19).
Pahinumdom pa ni Vergeire, kinahanglang may ipatumang sistema aron dili magtapok ang mga tawo nga mopila sa community pantry.

Dugang pa niini, kinahanglang mosunod pa gihapon ang tanan sa minimum health standards sama sa pagsuot og face mask, face shield ug social distancing.

Dinhi sa lalawigan sa Bohol, pipila na usab ka community pantry ang gibuksan.

Labing ulahi na niini ang Bohol Community Pantry nga gibuksan sa Diocese sa Tagbilaran niadtong Huwebes, Abril 22.  Nahimutang kini sa St. Joseph The Worker Cathedral ning syudad.

Kining community pantry sa simbahan, namugna pinaagi sa pakigtinabangay sa mga batan-ong negosyante sa Bohol.

Libreng gipanghatag sa maong pantry ilabi na sa mga kabus nga apektado sa COVID-19 ang mga pagkaon sama sa bugas, itlog, mga instant noodles, mga utanon ug prutas.

Simple lamang ang angay hinumdoman dinhi "mohatag base sa makaya, mokuha base lamang sa panginahanglan.”  (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments