Cebuano News: Capitol, Tagbilaran City Hall gisirado alang sa disinfection

TAGBILARAN CITY, April 23 (PIA) -- Gisirado ang Bohol Provincial Capitol ug ang  Tagbilaran City Hall Biyernes, Abril 23, 2021, alang sa pagpahigayon og disinfection isip parte sa pagpugong sa pagkuyanap sa coronavirus disease (COVID-19) tungod sa pipila ka empleyado sa maong mga buhatan sa gobyerno ang nag-positibo sa virus.

Ang regular nga operasyon sa maong duha  ka buhatan sa gobyerno ibalik sa Lunes, Abril 26, 2021.

Sa gipahigayong online press conference Biyernes sa buntag, ang tigpamaba sa Bohol Inter Agency Task Force (BIATF) Dr. Cesar Tomas Lopez mitaho nga may kinatibuk-ang 29 ka kawani sa Provincial Capitol ang nag-positibo sa COVID-19.

Ang nataptan sa virus nga mga kawani sa Kapitolyo naglakip sa 14 ka empleyado gikan sa Provincial General Services Office (PGSO) ug 15 gikan sa Provincial Treasurer’s Office (PTO).

Kining mga kawani gipaubos sa polymerase chain reaction (PCR) alang sa kumpirmasyon ug silang tanan nag-positibo sa PCR ug gi-isolate na, matud pa ni Lopez.

Sa advisory nga gipagawas Biyernes sa buntag pinaagi sa opisyal nga social media account sa Kapitolyo, ang kagamhanang probinsyal nitaho nga ang aktibong kaso sa COVID-19 sa lalawigan nikabat na sa 570 apil na sa 52 ka bag-ong mga kaso.

Sukad alas 7 sa buntag Abril 23, ang Bohol nakatala og kinatibuk-ang 2,275 ka kumpirmadong kaso sa COVID-19 diin 1,669 ang nangaayo na ug 36 na ang namatay.

Subling gipanawagan sa Kagamhanang Probinsyal sa Bohol ang estriktong pagsunod sa health protocols tungod sa padayong pagsaka sa kaso sa COVID-19 sa lalawigan. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments