Cebuano News: Bag-ong passenger terminal building sa Tagbilaran port, subhan sa DOTr, PPA

TAGBILARAN CITY, April 13 (PIA) -- Gitakdang subhan sa Department of Transportation (DOTr) ug sa Philippine Ports Authority (PPA) ang ikaduhang Passenger Terminal Building (PTB) sa pantalan sa Tagbilaran.

Ang pagkompleto sa kalamboan sa maong proyekto usa  ka mahinongdanon nga milyahe alang sa main seaport sa syudad sa Tagbilaran human nadaot ang istruktura sa kusog nga linog nga nitay-og sa lalawigan niadtong 2013.

Subhan kini sa Miyerkoles, Abril 14, 2021, nga maoy mag-marka sa pagsugod sa operasyon sa bag-ong PTB nga nahuman niadtong Okbubre 31, 2020.

Subhan sa DOTr ug PPA ang ikaduhang Passenger Terminal Building (PTB) sa pantalan sa Tagbilaran sa Abril 14, 2021, nga maoy mag-marka sa pagsugod sa operasyon sa bag-ong PTB sa Tagbilaran Port. (DOTr photo)

Pangunahan nilang DOTr Kalihim Arthur P. Tugade ug PPA General Manager Jay Daniel Santiago kauban sa ubang opisyal sa nasudnon ug lokal nga kagamhanan ang inagurasyon sa ikaduhang PTB.

Ang bag-ong nakompletong PTB gitukod aron madugangan ang kapasidad sa mga pasahero sa Port of Tagbilaran ug maghatag og mas komportable ug kombenyenteng pagbiyahe sa dagat.

Ang anaa na daan nga PTB sa Tagbilaran Port maka-akomodar og 497 ka mga pasahero. Samtang sa bag-ong nakumpleto nga PTB, maka-akomodar karon og 613 ka dugang pasahero nga magdala sa kinatibuk-ang passenger capacity ngadto sa 1,110.

Dugang sa nakumpletong duha  ka andana nga PTB, ang PPA nagbutang usab og pump house, nag-instalar og concrete pavements, ug nagbutang og lamp post foundations sa pantalan.

Human sa inagurasyon sa bag-ong PTB sa Tagbilaran Port, si Tugade, Santiago, ug ubang transport officials gipaabot usab nga mag-inspect sa laing dakung infrastructure project – ang Port of Maribojoc.

Ang pantalan sa lungsod sa Maribojoc usa usab sa mahinungdanon nga inprastraktura sa lalawigan nga hingpit nga naguba sa kusog nga linog niadtong 2013.

Ang Maribojoc Port Improvement Project hapit na makumpleto diin naa na sa 95.41% ang progress rate niini niadtong Marso 2021. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments