Cebuano News: 330 TUPAD beneficiaries sa Tagbilaran nakadawat sa ilang sweldo

TAGBILARAN CITY, April 12 (PIA) -- Tulo ka gatos katloan (330) ka mga nawagtangan og trabaho sa syudad sa Tagbilaran ang nakadawat sa ilang sweldo niadtong Abril 8, 2021, human nihatag sa ilang serbisyo pinaagi sa nagkalain-laing trabaho ubos sa programang Tulong Panghanapbuhay sa Ating Disadvantaged/Displaced Workers (TUPAD) sa nasudnong kagamhanan.

Nakadawat og tag P5,000 matag usa ang mga benepisyaryo sa maong programa atol sa gipahigayong ceremonial payout sa Tagbilaran City Hall nga gipangunahan ni Tagbilaran City Mayor John Geesnell Yap II ug mga kawani sa Department of Labor and Employment (DOLE).

Matud pa ni Yap nga ang tanang nawagtangan og trabaho gitogotan sa pagpahimos sa programa pinaagi sa Kagamhanang syudad sa Tagbilaran basta mga residente sila sa syudad.

“Basta taga Tagbilaran lang unya displaced worker ka, maka avail ka, unya gi-screen g’yud nato og pag ayo,” matud pa sa mayor.

Gibutyag usab ni Yap nga mangdawat na usab ang syudad sa laing batch sa mga benepisyaryo, samtang daghang ubang ahensya ang mogamit sa susamang programa aron magtanyag og tabang panginabuhian sa mga displaced workers.

Matud pa sa DOLE, ang inisyatiba sa TUPAD usa  ka community-based package sa assistance o hinabang nga naghatag og emergency employment alang sa mga displaced workers, underemployed ug seasonal workers.

Ang mga benepisyaryo niini gihatagan og trabaho sulod sa 10 ngadto sa 30 ka adlaw depende sa matang sa trabaho nga gihimo.

Kahinumdoman nga si Senador Joel Villanueva ang nitabang sa pagsiguro sa mga pondo alang sa implementasyon niining proyekto sa syudad sa Tagbilaran.

Ang buhatan ni Villanueva nihatag og hinabang nga nagkantidad og P33 milyon sa syudad sa Tagbilaran pinaagi sa nagkalain-laing programa, apil na ang mga  infrastructure projects. (ecb/PIA7-Bohol)

 



Source: Philippines Information Agency (pia.gov.ph)

Post a Comment

0 Comments