Cebuano News: 1.3M natupokan sa una'ng dose sa bakuna batok COVID-19

TAGBILARAN CITY, Bohol, April 22 (PIA) -- Hangtud sa Abril 20, 2021, mikabat na sa kapin sa usa  ka milyon ka Pilipino ang nakadawat sa unang tupok a bakuna batok sa coronavirus disease (COVID), samtang anaa na usab sa 209 mil ang nakakompleto na sa ikaduhang tupok sa bakuna, human sa 51 ka adlaw sukad masugdan ang pagpang roll-out sa bakuna sa nasud.

Segun sa taho sa National COVID 19 Vaccination Operations Center (NVOC), subay sa Philippine COVID-19 Vaccine Deployment and Vaccination Campaign, 1,353,107 na ang kinatibuk-ang ihap sa mga nakadawat sa bakuna samtang 209, 456 na usab ang nataho nga nakadawat sa ikaduhang tupokan sa bakuna.  

DILI NA MALANGAN. Sa dili madugay, magsugod na usab sa Bohol ang pagpangtupok sa bakuna ngadto sa mga senior citizens nga anaa sa Priority Group A2, human naduso na ang mga masterlists. Sa pagka karon, 126 pa ka senior citizens dinhi sa Visayas ang nakakuha sa bakuna sa Astrazeneca, segun sa NVOC. (rahc/PIA-7/BOhol)   

Sa Priority Group A1, nga mao ang mga health care workers nga anaa sa frontline heath care services ug permi nga makaduol sa posibilidad nga matakdan, 989, 703 na ang nakadawat sa unang jab sa bakuna.

Gawas kanila nga anaa sa medical frontline services, 165,374 na usab ka senior citizens nga anaa sa Priority Group A2 ang nakakuha na sa unang dose sa bakuna.

Sa laing bahin, 198,030 na ka indibidwal kinsa adunay mga gibati na nga daan nga sakit ang nahatagan na sa medical clearance sa ilang mga doctor ug nakalabang sa screening isip naa sa Priority Group A3 ug nabakunahan na usab.

Sanglit ang ikaduha nga dose sa bakuna makuha lamang human sa us aka buwan, sukad sa pagsugod sa pagpang bakuna, miabut na sa 209, 456 ka medical frontline workers kang kinsa nga unang pagtupok, milapas na sa usa  ka buwan igo usab sila pwede na nga mausban sa pagtupok.

Niini nga kadaghanon, 828, 310 ka tawo ang nakadawat sa SinoVac samtang 524,797 na usab ang nakadawat sa bakuna sa AstraZeneca, segun sa NVOC.

Sa Sentro nga Kabisay-an, sa 131,761 ka mga tawo nga nasukip sa listahan isip anaa sa Priority A1 o medical frontline workers, 78,779 na ang nakakuha sa unang tupok  ug anaa na sa 59.8% ang coverage niini, human sa 51 ka adlaw nga roll-out.

Hinuon, hangtud sa Abril 21, wala pay tataw nga pagsugod sa pagpangtupok sa bakuna alang sa Senior Citizens ang Central Visayas gawas sa 126 ka mga nalista nga nahatagan sa Astrazeneca.

Sa susama usab nga petsa, sa may alas 6:00 sa hapon, mikabat na sa 1,780,400 ka doses sa SinoVac ug AstraZeneca ang nahatag sa NVOC sa matag rehiyon isip una nga tupokan sa bakuna.

Gitaho usab sa NVOC nga wala nay rehiyon nga wala kasugod sa pagpang rollout sa bakuna sa ikaduha nga tupokan sa bakuna alang sa mga medical frontline health workers. (rahc/PIA-7/Bohol)



Source: Philippines Information Agency (pia.gov.ph)

Post a Comment

0 Comments