Aklanon News: Mga mangunguma sa Aklan nagbaton it mga makinarya

KALIBO, Aklan, Abril 17 (PIA) --  Beinte uno nga mga asosasyon it mga mangunguma sa probinsya it Aklan ro nagbaton kurundaya eamang it sari-sari nga mga makinarya sa pagpanguma halin sa gobyerno probinsyal it Aklan paagi sa Office of the Provincial Agriculturist (OPA).

Ro pagpanupod hay ginhiwat sa Barangay Nalook kon siin idto nakabutang ro Agri-Aqua Demonstration Farm ag Training Center, nga gintambungan ag ginpangunahan nanday Governor Florencio T. Miraflores, Vice Governor Reynaldo Quimpo, Provincial Agriculturist Salome David, ag iba pa nga mga opisyales it probinsya ag mga munisipyo.

Caption: Ginpangunahan ro pagpanupod it mga makinarya sa pagpanguma sa mga asosasyon sa Aklan ni Governor Florencio T. Miraflores (ikatlo halin sa waea) samtang ro iba nga mga opisyales it probinsya ag mga banwa sa letrato ngara ro nagsaksi sa pagpanupod. Kaibahan sa letrato ro representante it sangka asosasyon nga nagbaton it makinarya. (Letrato halin sa Office of the Provincial Agriculturist-Aklan)

Suno kay Salome David, Provincial Agriculturist, ro pagpangtao it sari-saring mga makinarya hay sangka paagi it gobyerno probinsyal sa pagbulig sa mga mangunguma nga maghagan-hagan ro andang gaeastuhon sa pagpanguma ag agud man magdugang ro andang ani.

Gindugang ni David nga libre nga ginatao ro mga makinarya sa mga asosasyon bilang insentibo man agud dugangan ro andang produksyon paagi sa mekanisasyon.

Ginpanupod sa nasambit nga aktibidad ro 11 nga mga “pumps ag engines” sa mga irrigators association it Barangay Ogsip ag Sibalew sa Libacao; banwa it Altavas; Cabayugan ag Cogon sa Malinao; Buenavista, Nabas; Argao, Malay; Ibajay; Calizo, Balete; Linabuan Norte, Kalibo; ag Bugasungan, Lezo, samtang 6 nga mga galingan ro ginpanupod sa mga irrigators association it Tigbawan, Madalag; Jalas, New Washington; Dumlog, Ibajay; Agbago, Ibajay; Guinbaliwan, New Washington; ag Guadalupe, Libacao.

Sa pihak nga parte, tatlo (3) nga tillers ro gintao it tigsambilog sa mga asosasyon sa Ortega, Libacao; Candelaria, New Washington, ag Batuan, Ibajay, samtang sambilog (1) nga rice thresher ro gintao sa asosasyon it Dumga, Makato.

Ginsugid man ni David nga ku nagtaliwan nga dominggo, napueo (10) nga water pumps ag daywa (2) nga galingan ro ginpangtao sa 12 nga mga irrigators associations.

Suno kana, ro probinsya hay nag-alokar it P18.5 milyon ku nagtaliwan nga dag-on agud ibakae it mga makinarya  kon siin 70 eon nga mga asosasyon ro naka benefisyo.

Sa dag-on ngara, ginsugid man nana nga may P13.5 milyon nga gina alokar para sa Farm Mechanization Program it probinsya. (JSC/VGV/PIA6 Aklan)

 



Source: Philippines Information Agency (pia.gov.ph)

Post a Comment

0 Comments