Tagalog News: 21 sambahayang benepisyaryo ng 4Ps nakatawid lagpas kahirapan

LUNGSOD CALOOCAN, Marso 8 (PIA) -- Abot sa 21 sambahayan na benepisyado ng Pantawid Pamilya Pilipino Program (4Ps) sa Metro Manila ang namaalam na sa pagtanggap ng 4Ps kamakailan lang.

Ito'y matapos ang 21 pamilya, sa tulong ng pamahalaan, ay nakatawid lagpas sa tulay ng kahirapan.

Ang kanilang graduation ceremony na may titulong “4Ps Regional Pilot Graduation Ceremony for Exiting Households in NCR [National Capital Region]" ay ginanap umaga ng Marso 8 sa Legislative building ng Lungsod Mandaluyong at binigyang dangal nina Department of Social Welfare and Development (DSWD) Secretary Rolando Bautista, Mayora Carmelita “Menchie” Abalos, mga opisyal ng DSWD at ng pamahalaang lungsod at mga miembro ng Regional Advisory Council na binubuo ng mga ahensiya ng pamahalaan na direktang nagbibigay tulong sa programa.

Sinabi ni DSWD-NCR Regional Director Vicente Tomas na ang pamamaalam ng mga benepisyado sa programa ay dumaan sa masinop na pagsusuri gamit ang social welfare indicator o Kilos Unlad Social Management Case at revalidation output ng kanilang nakatalagang case managers.

Nakita sa dalawang balidasyon na sila ay mga “self-sufficient” na, at puede nang mabuhay ng wala nang tulong mula sa pamahalaan.

Nagpasalamat naman si Tomas sa Pamahalang Lungsod Mandaluyong sa pamumuno ni Mayora Menchie Abalos sa kanilang magandang suporta sa programa.

Ibinahagi naman ni Joel Cam, Regional Coordinator ng 4Ps ng NCR ang mga dinaanan ng mga benipisyaryong mamamaalam na sa programa. Sinabi niyang hindi naging madali ang kanilang paglalalakbay sa lubak lubak na daan para makatawid sa tulay ng kahirapan. Mula sa pagpili para maging benipisyaryo, pagsunod sa mga kondisyon na kalakip ng programa para maiangat ang kanilang abang kalagayan.

Sa patunay ni Rowena Umali de Castro ng Barangay Addition Hills, isa sa mga benipisyado, tatlo ang kaniyang anak, dalawa ang babae at isang lalaki. Malaki ang naitulong ng programa para mapagtapos niya sa kolehiyo ang unang dalawang anak at ang bunso naman ay magkokolehiyo na. 

Aniya, sa gitna ng pandemya, natuto siya sa Family Development Session (FDS) gumawa ng lumpiang sariwa na kanilang itinitinda online kaya’t mayroon silang kita habang nakalockdown. Hindi rin naman problema ang kanilang kalusugan dahil alam niyang kaagapay nila ang PhilHealth.

Itinampok naman sa graduation ceremony ang pagpirma ng “Specific Implementation Agreement” para sa after-care program ng Pamahalaang Lungnsod Mandaluyong para sa kanilang palabas na mga benipisyado.  Pagkatapos ng pirmahan ay isinagawa din ang pagbibigay ng case folder ng 21 pamilya kay Mayor Menchie para naman sa after-care na mga programang ibibigay nila sa mga gradweyts.

Sinabi ni Mayor Abalos na nakita niya kung gaano ipinagmamalaki ng bawat exiting benipisyaryo ang kanilang pag-ahon sa kahirapan, ang kanilang mga napagtapos na mga anak. Hiling niya na sana ay maging gabay sila sa kapwa 4Ps para makaahon din.

Ipinaabot din ni  Mayora Menchie ang kaniyang taos pusong pasasalamat sa mga tulong na pinaaabot ng DSWD sa kanilang mamamayan lalo na ngayong panahon ng pandemya.

Nagpasalamat naman si DSWD Secretary Rolando Bautista  sa tulong at suporta sa programang Pantawid Pamilya Pilipino Program ng lokal na pamahalaan sa pangunguna ni Mayor Menchie Abalos.

“Salamat sa inyong pagtupad sa mga pangako na umunlad at abutin ang inyong mga pangarap. Naipakita ninyo na bagaman may unos, ipinakita ninyo ang inyong katatagan. Patunayan [natin] sa mamamayang Filipino na hindi sayang ang ang pondong inilaan sa inyo ng pamahalaan," bahagi ng mensahe ni Sec. Bautista.

"Magsilbing inspirasyon sa mga komunidad at kapwa benipisyaryo. Maging katuwang sana sa paggabay sa iba pang benipisyaryo. Patuloy na gamitin ang inyong naging kaalaman lalo na sa FDS. Hangad namin ang inyong pag-unlad at huwag nang bumalik sa kahirapan," dagdag pa ng kalihim.

Ang Pantawid Pamilya Pilipino Program ay programa ng pamahalaang nasyunal na sinimulan ng dating Pangulong Gloria Macapagal Arroyo.

Layunin nitong maiahon sa abang kalagayan ang mga mamayang Filipinong nakalublob sa kahirapan.

Tumutulong ang programa na maiangat ang kanilang pisikal, panlipunan at ekonomiyang kalagayan/ Ito ay sa pamamagitan ng pagpapataas ng kamalayan ng sambahayan upang pahalagahan ang kanilang kalusugan, desisyon, edukasyon at aktibong pakikilahok sa komunidad.

Ang tulong ng pamahalaan ay maykaakibat na mga kondisyon na kailangan sundin ng bawat sambahayan upang hindi sila matanggal sa programa.

Maaring maalis sa programa kapag ang huling batang minomonitor ng programa ay umabot na ng 18 taon, ang kinikita ng pamilya ay mas mataas na kaysa sa povery threshold kaya may kakayahan nang tugunan ang kanilang pangangailangan, pitong taon na sa programa at nagkaroon ng paglabag sa kasunduan sa kontrata. (PIA NCR)



Source: Philippines Information Agency (pia.gov.ph)

Post a Comment

0 Comments