Kinaray-a News: Secretary Cimatu ginpangunahan ang PENRO groundbreaking

SAN JOSE, Antique, Marso 25 (PIA) -- Ginpangunahan ni Department of Environment and Natural Resources (DENR) Secretary Roy Cimatu ang sangka groundbreaking ceremony kang bag-o nga talatapan kang Provincial Environment and Natural Resources Office (PENRO) nga kabahin man kang Malandog River Rehabilitation and Development (MaRiReDep) nga proyekto.

Sa ana nga mensahe, ginpahayag ni Cimatu nga ang dya nga kahiwatan sangka pamaagi sa pag-reyalisar kang pag-amlig kang suba kang Malandog kag pag-preserba kang dunang manggad.

Ginpakigbahin man ni Cimatu nga gin-aprobahan dun kang Department of Budget and Management (DBM) ang P50 milyon para sa pagpatindog kang nahauna nga bahin kang proyekto.

Nagserbe man nga inspirasyon ang balangay nga sahi kang bangka kang nasambit nga opisina nga igapahamtang malapit sa suba kang Malandog sa Maybato Sur, San Jose.

Suno naman sa PENRO, ang darwa ka storey nga ‘green’ building ang may rugyan kang floor area nga 1,516.77 square meters kag dya ang maga-gamit kang mga renewable energy kaangay kang hangin kag sirak kang adlaw.

Sa pihak nga bahin, may dugang nga P50 milyon pa nga paga-aprobahan para sa ikarwa nga bahin kang site development.

Groundbreaking. Nangin kaimaw ni DENR Secretary Roy Cimatu ang mga opisyales kang andang talatapan sa rehiyon kag mga LGUs rugya sa Antique sa ginhiwat nga groundbreaking ceremony kang PENRO building sa Maybato Sur, San Jose. (pia6-LML)    

Kabahin man kang ikarwa nga parte kang proyekto amo ang pagbutang kang mga pasilidad kang opisina, parking, perimeter fence, canopy space, mga tanom,kag pagpa-obra kang dalanon.  

Nagmando ang DENR Secretary nga ang pagpasad kang dya nga opisina magatapos sa Disyembre 2021.

Ana man nga ginakabig ang MaRiReDep bilang sara sa mga proyekto kang DENR nga ginapasulabi rugya sa probinsya.   

Sa bahin kang PENRO, ang suba kang Malandog ang parte kang mga kabanwahanan kang Sibalom, San Jose, kag Hamtic.

Dugang pa, nangin importante nga bahin ang suba bilang cradle kang pre-historic Malayan settlement (ginluntaran kang mga Malay kang wara pa masulat ang maragtas) kang pungsod.

Samtang, suno naman kay House Deputy Speaker kag Antique Lone District Representative Loren Legarda, may bahol nga bahin ang PENRO kag ang mga kaimaw nga talatapan sa pagtipig kang palibot nalakip na ang pag-preserba kang mga pinanubli kang probinsya.   

Ginhingyo man ni Legarda ang mga katawhan sa pagsunod kang mga patakaran angot sa Republic Act 9003, nga nagtugro kang importansya kang ecological solid waste management. (JSC/LML/PIA6 Antique)   



Source: Philippines Information Agency (pia.gov.ph)

Post a Comment

0 Comments