Gingoog, top performing city sa RRTB Interim Outcome for 2020

GINGOOG CITY, March 9--Pormal nga gipasidunggan sa lokal nga pangagamhanan ang Tuberculosis Team sa City Health Office ubos sa pagdumala ni City Health Officer Dr. Grace J. Jadol, human niini nakab-ot ang bag-ong award isip 1st Placer sa mga top performing cities and municipalities sa nasud para sa Rifampicin-Resistant Tubercolosis (RRTB) Interim Outcome sa tuig 2020 gikan sa World Health Organization (WHO) ug Department of Health (DOH).

Ang TB sa mga health issues nga padayon nga gitutukan sa Dakbayan. Pinaagi sa programa nga TB-DOTS, ubay-ubay na nga mga residente sa Gingoog ang napailawom sa testing ug treatment arun maatiman ang kahimtang niini ug malampuson nga natambalan.

Ang Rifampicin-Resistant Tubercolosis (RRTB) usa ka klase sa Drug-Resistant TB nga mukabat sa 9-11 ka bulan o 20-24 ka bulan ang treatment plan depende sa gipahaom nga individualize program management sa matag pasyente.

Ang interim outcome sa RRTB nakabase sa resulta sa bacteriological status ug TB culture sa matag pasyente sa ika-unom ka bulan niini sa treatment program. Base sa cohort analysis, ang tanan enrolled Drug-Resistant TB patients sa dakbayan, nag negatibo ang resulta human sa unom ka bulan niini sa programa.

Ang maong resulta usa ka dakong basehan nga magmalampuson ang treatment plan sa usa ka DRTB patient tungod kay na-overcome niini ang mga adverse reactions gikan sa pagsugod niini sa treatment.

Gipasigarbo sa CU Administration ang Tubercolosis Team ubos sa pagdumala ni Dr. Agnes A. Centino, Ms. Ava Magnolia Bañaga, RN, Ms. Shirley F. Guanzon, RN, Ms. Julifer Daryl V. Calagui, RN ug Ms. Mabel E. Lagbas, RMT, ug Ma. Cristina G. Moro, RMT, tungod kay ang ang maong award nagpamatuod lamang sa sakripisyo ug dedikasyon nga gihatag sa maong team arun masiguro nga mapaabot ang epektibo, epesyente ug malahutayon nga pagpangalagad sa mga Gingoognon. Padayon usab niini nga gipaabot ang suporta sa mga lakang sa DOH ug CHO para sa kaayuhan sa mga lumulupyo sa dakbayan.

Nitambong sa maong kalihokan si City Mayor Erick G. Cañosa ,Vice Mayor Peter M. Unabia, Kag. Evelyn Cañosa, Kag. Jerome Mercado, Kag. Winfred Militante, Jr., Kag. Judeline Bernaldez, Kag. Conrado Gomez Jr., Gomez, ug mga personahe sa CHO. (Gingoog City IO)



Source: Philippines Information Agency (pia.gov.ph)

Post a Comment

0 Comments