Frontline health workers sa mga MOPH nabakunahan na

MISAMIS ORIENTAL, Marso 24 --Malipayon nga gipahibalo ni Provincial Inter Agency Task Force Chief Dr. Jerie Calingasan nga malampuson na nga napahigayon ang vaccination sa mga frontline health workers sa tanang mga Misamis Oriental Provincial Hospitals (MOPH) lakip ang pipila ka mga pribadong ospital sa lalawigan.

Gipaabot sab ni Dr. Calingasan nga sa tanang walo ka provincial hospitals, 903 ka mga frontline health workers gikan sa target nga 1000 o 90.3% ang hingpit nang nabakunahan, samtang alang sa mga pribadong ospital, 899 gikan sa 944 ang nabakunahan o 95.2%.

Mapasigarbuhon usab nga gibutyag ni Dr. Calingasan nga tungod sa ka-maayo sa mga doktor, nars, ug staff sa mga Provincial Hospitals sa lalawigan, anaay mga higayon nga nalabwan pa sa mga provincial hospitals ang girekomenda nga kadaghanon sa mga mabakunahan matag vial gikan sa girekomendang kadaghanon sa Department Of Health (DOH).

Pagtin-aw ni Chief Calingasan, tungod sa mando ni Gobernador Bambi Emano nga siguruhong walay masayang nga mga vaccine inubanan sa ka-hanas sa tanang staff sa mga provincial hospitals, nalikayan ang vaccine wastage ug anaay mga higayon nga 12 ka vaccinees matag vial ang nabakunahan, labaw ug duha kung itandi sa 10 nga gibana-bana sa DOH.

Sa kinatibuk-an, 1802 ka mga frontline health workers ang nabakunahan gikan sa target nga 1944 o 93%.

Tungod sa malampuson nga vaccination sa mga frontline health workers, malaumon si Provincial IATF Chief Dr. Jerie Calingasan ug Gobernador Bambi nga sa oras nga moabot ang dugang mga vaccine sa lalawigan, mapadali ug mapalapad pa ang vaccination campaign subay sa giandam nga mga plano sa Provincial IATF aron hingpit nang makalingkawas ang katawhan batok sa pandemya. (Misor PIO)



Source: Philippines Information Agency (pia.gov.ph)

Post a Comment

0 Comments