Fire Prevention month go-saulog sa Gingoog

GINGOOG CITY, Misamis Oriental, March 9--Opisyal nga gisugdan ang pagsaulog sa Fire Prevention Month 2021 pinaagi sa pagpatingog sa siren alas-says sa kabuntagon sugod sa bulan sa Marso nga gisundan sa usa ka motorcade ubos sa tema karong tuiga, "Sa Pag-iwas sa Sunog, Hindi ka Nag-iisa".

Tumong sa maong kick-off nga mapahibalo ang mga Gingoognon sa mga aktibidades sa buhatan sa Bureau of Fire and Protection-Gingoog ug mapaabot ang kampanya niini sa fire prevention.

Pinaagi sa 1986 Presidential Proclamation No. 115-A, gi deklara ang buwan sa Marso isip Fire Prevention Month tungod sa pagtaas sa kaso sa sunog sugod bulan sa Marso.

Pinaagi sa pagpahigayon og mga information drive ug uban pag kalihokan batok sa fire prevention, gilauman nga maminusan ang mga kaso sa sunog, makabaton ug dugang kaalam ang mga residente sa dakbayan, ug mapanghingusgan ang responsibilidad sa matag Gingoognon sa pagsiguro sa kaluwasan sa matag pamilya niini.

Gipaabot sa CU Administration ang hugot niini nga suporta sa mga lakang sa buhatan sa BFP. Dako ang pagpasalamat niini tungod kay nakita sa kasamtangang administrasyon ang sakripisyo sa mga fire fighters arun masiguro ang kaluwasan sa matag pamilyang Gingoognon dili lamang panahon sa sunog kundili lakip usab sa panahon sa kalamidad.

Padayon usab ang pagpahigayon og mga kalihokan sa buhatan sa BFP agi'g pagselebrar sa Fire Prevention Month. Para sa emergency assistance, mamahimo nga mutawag sa BFP Gingoog Hotline: 0906-032-5566. (Gingoog City Information Office)



Source: Philippines Information Agency (pia.gov.ph)

Post a Comment

0 Comments