Cebuano News: Pagpalapad sa Moringa Processing Project sa Jabonga gipursige

DAKBAYAN SA BUTUAN, Marso 11 -- Nauyonan sa ikaduhang miting tali sa mga representante sa lungsod sa Jabonga, sa non-government Agri-Aqua Development Coalition (AADC) ug sa probinsya sa Agusan del Norte pinaagi sa mga personahe sa AGUSAN UP! nga ipursige ang pagpalapad sa Moringa Processing Project alang sa kabulahanan sa labing ubos 50 ka pamilya nga nagpasiugda niini.
 
Sugdan ang lakang pagpalapad sa operation niini sa diagnostics nga himoon aron mahimong basehan sa hulmahon nga business plan.
 
Ang mahimong business plan nga gipunting nga mahuman sa Abril ang mahimong basehan unya sa mosunod nga mga lakang unya.
 
Sumala pa ni Glenda Plaza, ang deputy administrator sa AADC, ang NGO nga nagtabang sa pagpahiluna sa maong proyekto nga daku ang mahimong tabang sa maong proyekto sa panginabuhian sa mga residente sa mga lungsod sa Jabonga ug Kitcharao, ilabi na sa mga kababayen-an nga maoy nag-unang makabenepisyo sa proyekto sa pagproseso sa moringa powder, moringa tea, ug flakes.
 
Mahinumdoman nga isip resulta sa unang meeting nga gipatawag ni Mayor Napoleon Montero sa Jabonga naporma ang Techincal Working Group (TWG) nga motuon sa mahimong lakang aron ma-estabize ug mapalapad ang operisyon sa maong proyekto. 
 
Ang nakita nga problema sa kooperatiba sa kababeyen-an nga nagpadagan sa proyekto ngano nga hinay ang dagan sa proyekto mao ang panginahanglan og building nga mahimong kapahilunaan sa makinarya aron makakuha ang proyekto og License to Operate ug Certificate of Product Registration gikan sa Food and Drug and Administration (FDA). 
 
Apan nauyonan sa unang meeting nga posibleng naa pay mga kinahanglang tan-awon sa kinatibuk-an aspeto sa proyekto aron magmalamposon ang pag-establize ug pagplapad sa operisyon niini.
 
Ang pagpahiluna og mga processing projects kabahin sa Process! Process! Process! Project sa AGUSAN UP!, ang kampanya sa pagpalambo sa administrasyon ni Gobernador Dale B. Corvera kaabag ang buhatan ni Kongresista Angel Amante-Matba. (Angel Lyn F. Gaviola, LGU Agusan del Norte/PIA Agusan del Norte)

 



Source: Philippines Information Agency (pia.gov.ph)

Post a Comment

0 Comments