Cebuano News: Gobyerno, nipasidaan batok sa di awtorisadong pagbaligya og COVID-19 vaccines

Joint statement nga gipagawas sa National Task Force against COVID-19, DOH, ug FDA nga nagklaro nga libre ang mga bakunang gigamit sa immunization program nga gihatag sa mga medical frontliners ug nagpasidaan sa publiko batok sa pagpalit sa mga bakuna batok COVID-19 nga gibaligya sa pipila ka organisasyon o indibiduwal. (DOH/PIA)

TAGBILARAN CITY, March 18 (PIA) -- Nipasidaan ang gobyerno sa publiko sa dili pagpalit sa mga bakuna batok COVID-19 nga gibaligya sa pipila ka organisasyon o indibiduwal.

Sa usa  ka hiniusang pahayag nga gipagawas sa National Task Force against COVID-19, Department of Health (DOH), ug Food and Drug Administration (FDA), giklaro nila nga libre ang mga bakunang gigamit sa immunization program nga gihatag sa mga medical frontliners.

Ang Emergency Use Authorization (EUA) nga gihatag sa ubang COVID-19 vaccine dili market authorization o Certificate of Product Registration – nagpasabot nga dili mahimong ibaligya ang mga bakuna sa publiko.

Nigawas nga may pipila ka negosyanteng Filipino-Chinese ang planong magpahigayon og kaugalingon nilang vaccination drive sa sunod buwan gamit ang Sinovac vaccines sa China.

Giklaro ni Vaccine Czar Carlito Galvez Jr. nga ang re-selling sa COVID-19 vaccines walay pagtugot sa gobyerno.

Ang mga bakunang nahatagan og EUA sa FDA mao lamang ang Pfizer, AstraZeneca, ug Sinovac.

Ang manufacture, importation, exportation, sale, distribution, transfer, non-consumer use, promotion, advertising, o sponsorship sa bisan unsang dili rehistradong produkto sa panglawas gidili ubos sa FDA Act of 2009.

Mokabat hangtod sa 10 ka tuig nga pagkabilanggo ug may multa nga dili moubos sa ₱50,000 ug dili molapas sa ₱500,000 ang silot sa molapas niining balaod. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments