Cebuano News: Dugang 30T doses bakuna sa Sinovac, niabot sa Bohol

Niabot ang mga bakuna sa Sinovac sa Bohol niadtong Sabado sa gabii sa Tubigon Port lulan sa FastCat Ferry gikan sa DOH-7 sa syudad sa Sugbo. (Hulagway ni Dr. Anthony Damalerio/PDRRMO)

TAGBILARAN CITY, March 22 (PIA) -- Miabut ang mga 30,000 ka doses ka bakuna sa Sinovac COVID-19 vaccines sa Bohol niadtong Sabado sa gabii, Marso 20, 2021.

Mao kini ang ikatulong batch sa China-made nga CoronaVac vaccines nga nadawat sa lalawigan isip parte sa bakuna batok COVID-19 nga gigahin alang sa mga healthcare workers sa Bohol.

Si Provincial Disaster Risk Reduction and Management Office (PDRRMO) Chief Anthony Damalerio sa iyang Facebook post nipahibalo nga ang ikatulong batch sa mga bakuna niabot sa Bohol eksakto alas 10:30 Sabado sa gabii sa Tubigon Port sakay sa FastCat Ferry gikan sa Department of Health (DOH) 7 sa syudad sa Sugbo.

Gidawat nila ang mga bakuna sa ngalan ni Gobernador Arthur Yap.

Niadtong Marso 14, ang ikaduhang batch sa mga bakuna nga gilangkoban sa 5,140 ka  doses sa AstraZeneca ug 1,340 doses sa CoronaVac ang niabot sa  Bohol nga naghatag dalan sa mas halapad nga pagpamakuna sa mga health workers sa lalawigan.

Ang unang vaccination rollout sa lalawigan gipahigayon niadtong Marso 6 diin 2,860 ka bakuna ang niabot sa lalawigan nga gigahin alang sa mga health workers sa Gov. Celestino Gallares Memorial Hospital (GCGMH), ang nag-inusarang level three COVID-19 referral health facility sa Bohol. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments