Cebuano News: Awhag sa DOH: Mag-face mask sulod sa balay kun may laing kauban

Tungod sa nagkasakang kaso sa COVID-19 sa tibuok nasod, nipagawas ang DOH og mga sumbanan alang sa publiko aron mapugngan ang pagkatap pa sa maong sakit. (DOH)

TAGBILARAN CITY, March 22 (PIA) -- Pormal nang gitambag sa Department of Health (DOH) sa publiko ang pagsuot og face mask sulod sa mga balay kun may kauban bisan mga paryente pa kini.

Sa lima  ka rekomendasyon nga gihatag sa DOH niadtong Sabado sa gabii, Marso 20, kauban niini ang “Mask at home when not alone”.

“Everyone is called on to wear their mask properly, and to observe other preventive strategies, AT ALL TIMES and IN ALL SETTINGS even at home when living with other persons, especially the vulnerable,” awhag pa sa DOH.

Kini human nikabat niadtong Sabado sa hapon ang mga bag-ong kaso sa COVID-19 ngadto sa 7,999 nga maoy pinakataas nga natala sa nasod sa dihang nagsugod ang pandemya.

Gawas niini, gitambag usab sa DOH nga magpabilin lamang sa balay ang publiko kun dili “essential” o mahinungdanon ang tuyo; siguradohon nga maayo ang sirkulasyon sa hangin sa mga balay; mo konsulta dayon kun makasinati og mga sintomas; ug moadto na dayon sa mga isolation facilities imbes nga sa mga ospital.

Nipahinumdom usab ang DOH sa publiko nga dili mogawas sa balay karong Semana Santa ug mag-online mass na lang una. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments