Aktibo ang monitoring ug surveillance sa PVET sa ASF

MISAMIS ORIENTAL, March 24--Gipahibalo sa buhatan sa Provincial Veterinary Office (PVET) nga hugot pa ang ilang gihimong monitoring ug surveillance aron dili na mokaylap ang giatubang nga problema sa Misamis Oriental nga mao ang African Swine Fever (ASF).

Gipaabot ni PVET Head Dr. Benjamin Resma adlawng Lunes dungan sa Virtual Flag Raising sa Kapitolyo Probinsyal, Marso 15, 2021 nga adunay bag-ong natala nga kaso sa ASF nga miguwa ang resulta niadtong petsa 12.

Ang nadugang mao ang Purok 3 ug Purok 6 sa Kanitoan, Initao; Purok 8, sa Baybay, Alubijid; Purok 1 ug Purok 3 Lanao, Alubijid ug sa Purok 7 ug Purok 8 sa Poblacion, Alubijid. Sa kinatibuk-an aduna nay 14 ka mga Barangay sulod sa 5 ka mga munisipyo ang nagpositibo sa ASF.

Sa talaan usab aduna nay 1, 237 nga mga baboy ang na-culled ug 342 na ka mga hog raisers ang naapektuhan niini.

Mas gipakusog pa ug gipahugtan sa PVET ang ilang Active Surveillance & Disease Investigation kon diin kini ang nag-unang lakang nga mokuha og sampol sa dugo sa baboy aron masuta kon kini positibo o nagnegatibo ba sa sakit nga ASF.

Sa pagkakaron adunay 32 ka mga barangay sulod sa 9 ka mga munisipyo ang ubos sa Active Surveillance and Disease Investigation.

Usa sa nakita nga rason nganong adunay mga binuhing baboy ang nataptan sa ASF gumikan sa kakulang sa sayo nga pag-ila ug dili igo ang kahibalo sa pagdeterminar sa sakit hinungdan usa kini sa lakang nga gihimo sa buhatan sa PVET nga i-edukar ang mga gabuhi og baboy nga kung adunay mga mamatikdan sa ilang binuhi idoul dayon kini deretso sa Veterinary Office sa matag munisipyo.

Ang kagamhanan sa probinsya ubos sa liderato ni Governor Bambi Emano padayon sa pagpaningkamot nga mapugngan kini sakit sa binuhing baboy ug dili na mokaylap apan makab-ot lamang kini kung magkooperar ang katawhan. (MisOr PIO)



Source: Philippines Information Agency (pia.gov.ph)

Post a Comment

0 Comments