Aklanon News: 420 mil nga mga Aklanon pagabakunahan kontra COVID-19

KALIBO, Aklan, Marso 11 (PIA) --  Tuyo it probinsya it Aklan nga mabakunahan ro 420,000 nga mga Aklanon.

Ginhambae ni Governor Florencio T. Miraflores nga ro pagbakuna it rayang numero it mga Aklanon nga naga representar it 70 porsyento it populasyon it Aklan nga makaron hay una eon sa 600,000 hay makatuga it ginatawag nga “herd immunity” sa probinsya nga magaabang sa padayon nga pageapnaag it COVID-19 agud makabangon eon ro ekonomiya it probinsya.

Ginpaabot raya nga mensahe ni Governor Miraflores pagkatapos nga mabaton it probinsya ro primero nga “batch” it Sinovac vaccines nga 2,420 para iturok sa mga medical frontliners it Aklan nga una sa mga ospital nga ginadumaeahan it gobyerno ag sa pribado.

Pag-abot eagi it mga bakuna, ginbutang ra sa storage facility nga ginpahaum it probinsya idto man sa compound it Dr. Rafael S. Tumbokon Memorial Hospital (DRSTMH).

Gin uman pa gid ni Governor Miraflores ro anang ginhambae sa ginhiwat nga sangka press briefing sa Conference Room it Governor’s Office pagkatapos it baton it mga bakuna halin sa DOH 6, kon siin nag apela man imaw sa media nga buligan ro gobyerno probinsyal nga maghambae sa sangka limog eamang sa pagpaabot sa publiko it importansya it pagpabakuna kontra sa COVID-19.

Ginpasalig man nana ro lokal nga media nga ro probinsya hay may ginapatigayon nga maid-id nga information campaign paagi sa sa mga interview sa media ag sa mga programa sa lokal nga cable television para ipahisayud ag ipakita sa publiko nga euwas ro bakuna.

Ginhambae man nana nga pila nga mga nagapanguna nga mga health officials sa probinsya ro mangin una nga mga frontliners nga pagabakunahan halin it Marso 10 hasta 12 it rayang dag-on agud magtuga it pagsalig sa publiko nga euwas ro bakuna ngara kontra sa COVID-19.

Ro ABL Sports Complex ro pinili nga lugar nga hiwatan it pagbakuna sa sueod it tatlong adlaw ngara para sa mga frontliners, partikular ro mga una gaobra sa DRSTMH.

Ginhambaean man ni Miraflores ro mga Municipal Health Officers (MHOs) ag mga gobyerno lokal nga obserbahan ro mga tikang it pagbakuna sa ABL Sports Complex agud kon mag-abot eon ro andang turno, sayud nanda kon ano ro andang obrahon.

Suno  sa Gobernador, 100 ro gina target nga bakunahan kada adlaw sa pag asistir it sangka vaccination team ag ro pagbakuna ngara kontra sa COVID-19 hay mabahoe nga paghangkat sa mga health workers bangud ro pagbakuna sa 420,000 nga mga Aklanon hay magaabot sa mahaba nga tiyempo.

Sa parte ni Dr. Maila Bernabe, Development Management Officer (DMO) V it Provincial DOH Office, ginpasalig nana ro mga opisyales it probinsya ag ro publiko sa pangkabilugan nga ro mga una nga pagabakunahan hay sigurado man nga mabakunahan sa ikaywang kahigayunan nga mabaton nanda pagkatapos it 28 diyas.

Nag apelar man si Bernabe sa mga Aklanon nga magpabakuna it kon ano nga mga bakuna ro una, bangud raya hay epektibo ag gintun-an it mayad antes itao sa publiko.

Ginhambae man it mga health officials nga ro Sinovac vaccine hay 50 porsyento nga epektibo sa “mild” nga kaso it COVID-19; 70 porsyento nga epektibo sa “moderate” nga kaso, ag 100 porsyento nga epektibo sa “severe” nga kaso.  (JSC/VGV/PIA6 Aklan)



Source: Philippines Information Agency (pia.gov.ph)

Post a Comment

0 Comments