246 vials sa AstraZeneca vaccines gipadala sa MisOr

MISAMIS ORIENTAL, Marso 25--Usa ka send-off sa 246 vials sa AstraZeneca vaccine ang gipahigayon sa Panggamhanang probinsyal sa Misamis Oriental adlawng Domingo, Marso 21,  ngadto sa siyam ka mga lungsod sa Tagoloan, Opol, Medina, Balingasag, Initao, Villanueva, Jasaan, Alubijid ug Kinoguitan ug duha ka siyudad sa Gingoog ug El Salvador.

Kini nga mga vaccine vials nakatagana na nga mo-inoculate o mobakuna sa 2,662 frontliners langkoban gikan sa Rural Health Units (RHUs), Temporary Treatment Monitoring Facilities (TTMFs), City Health Offices (CHOs), lakip mga Barangay Health Workers (BHWs) sa nasangpit nga mga lugar.

Mandato ni Gobernador Bambi nga dili angayan malangan ug kinahanglan ang hustong pagsubay sa prioritization framework aron nga plastar ug dunay koordinasyon ang pag-implementar sa vaccination roll-out process sa matag munisipyo kay lakip kini sa mga lakang aron matubag ug mapakgang ang makamatay nga CoVid-19.

Sa pagpanguna ni IATF Chief ug PHO-MisOr Head nga si Dr. Jerie Calingasan katimbayayong ang iyang mga staffs, malampusong naasistar ug nahatagan ang tanan og alokasyon sumala sa listed allocated personnel kon medical practitioners.

Sa maong kalihokan sab mipakita og hugot nga suporta ang tanang LGUs gumikan na sa pagpagamit sa mga ambulansya ug dunay escort nga mga personahe gamit ang mga police car sa PNP-10 sa matag munisipyo aron masiguro gayud dili malangan ug luwas nga ma-transport ang tanang vaccine vials.

Mapasalamaton ang tanang munisipyo nga nahatagan prayoridad sa pagkakaron kung asa una nang gisaad ni Gobernador Bambi nga ang tanan dili makalimtan ug matagaan sa mga bakuna.

Human nga mipirma ang mga representante sa Requisition and Issuance Slip isip pagpamatuod nga nidawat sila sa maong alokasyon, wala na kini naglangay aron gilayon makapadayon na sa pagbakuna ngadto sa ilang mga lungsod.

Lauman nga karong semana laing hugna na sab sa mga frontliners ang mamahimong bakunahan sama nalang sa mga empleyado gikan sa PHO human nga duna nay nakagahin nga 25 AstraZeneca vaccine vials nga mahimong mobakuna og kapin kon kulang 250 ka tao.

Sukad pa sa sinugdanan wala na miundang ang kagamhanang probinsya sa Misamis Oriental sa pakigbatok sa pandemya ug una kanunay si Gobernador Bambi ug Dr. Calingasan sa pagsiguro nga luwas ang katawhan sa lalawigan.

Niining pagdangat sa mga bakuna nga maoy nakitang solusyon sa amahan sa lalawigan nga mobalik sa normal ang tanan giaghat niini ang katawhan nga kung modangat pa ang laing batch sa vaccines dili na magduha-duha sa pagpabakuna. (MisOr/PIO)



Source: Philippines Information Agency (pia.gov.ph)

Post a Comment

0 Comments