Tagalog News: DA patuloy ang pagtulong sa mga magsasaka sa CALABARZON

LUNGSOD NG LUCENA, Quezon, Peb. 15 (PIA) --Inihayag ni Department of Agriculture Region-4A Officer-In-Charge Regional Director Vilma Dimaculangan na patuloy na tumutulong ang kanilang tanggapan sa mga magsasaka sa lalawigan ng Quezon gayundin sa mga lalawigang sakop ng Region-4A.

Sa idinaos na virtual Kapihan sa PIA Quezon noong Pebrero 10, sinabi ni Dimaculangan na marami nang magsasaka ang kanilang mga natulungan sa pamamagitan ng pagbibigay ng mga fertilizer, mga seedlings at iba pang ng uri ng ayuda sa ilalim ng programang “SURE AID Program ng DA. 

Maliban dito, nagkaloob din ang DA ng cash assistance sa mga magsasakang na apektado ng pagbagyo sa nakalipas na taon.

Samantala, hinikayat ni Dimaculangan ang mga magsasaka sa Quezon na magpa-seguro sa Philippine Crop Insurance Corporation para makakuha ng loan program na walang babayarang interest upang may magamit sila sa kanilang mga gawaing pangkabuhayn kagaya ng pagtatanim ng mga gulay at iba pa.

“Maaaring makautang ang mga magsaska ng halagang P25,000 na walang ipapataw na interes”, sabi ni Dimaculangan.

Dagdag pa niya, marami ang maitutulong ng Philippine Crop Insurance Corporation sa ating mga magsasaka kung magpapa-insure.

Ibinalita rin ng opisyal na tuloy-tuloy ang ginagawang konstruksiyon ng Sariaya Agricultural Training Facility na pinondohan ng DA ng halagang P100M mula isa Bayanihan Stimulus Fund.

Target matapos ang proyekto sa  Hunyo 30, 2021 at magsisilbing training center ang nasabing pasilidad sa mga magsasaka sa bayan ng Sariaya at iba pang mga bayan sa lalawigan  ng Quezon.

Sa Kapihan sa PIA, sinabi rin ni Director Dimaculangan na sinisiguro ng kanilang tanggapan na may sapat na pagkain sa CALABARZON at patuloy din ang kanilang pagmo-monitor ng presyo ng mga gulay at karne sa pamamagitan ng kanilang “Bantay Presyo Team” upang mapangalagaan ang mga mamimili laban sa mga taong sobrang magtaas ng presyo ng kanilang panindang karne at mga gulay. (Ruel Orinday-PIA-Quezon)
 
 



Source: Philippines Information Agency (pia.gov.ph)

Post a Comment

0 Comments