Kinaray-a News: Legarda padayon nga magasuporta sa mga MSMEs

SAN JOSE, Antique, Pebrero 12 (PIA) - - Si Deputy Speaker kag Representative Loren Legarda  nagkomiter kang anang padayon nga suporta sa mga magagmay nga negosyante ukon micro, small and medium enterprises (MSMEs) kag iba pa nga maga pigado nga katawhan para padayon sanda makakita kang parangabuy-an.

Sa anang mensahe kang ginhiwat ang "virtual turnover" kang mga shared service facilities sa Antique, ana ginhamabal ang pagbuligay kang mga ahensya kang gobyerno para sa padayon nga pagbulig sa mga katawhan kinahanglanun para sa tayuyon nga pag-abot kang mga proyekto.

Ana ginhambal nga matapos maka-agum kang training ang mga katawhan, kinahanglan na pa ang kapital kag mga kagamitan para nga padayon nga mapasanyog ang ana proyekto, gani kianahanglan magbuligay ang mga ahensya kag gobyerno.

Dugang na nga ginhambal nga ang mga iskolar kang Technical Education and Skills Development Authority pwede man maka-agum kang Shared Service Facilities (SSF) ka Department of Trade and Industry kag Pangkabuhayan halin sa Department of Labor and Employment.

Ang pundo kang SSF nadugangan man para sa mga magagmay nga negosyante, kooperatiba kag asosasyon.

Halin kang 2018 tubtob 2020, ang DTI nag aprobar kang 78 MSMEs sa kantidad nga masobra P95 milyones kag ang 31 kadya iga-implementar kadya nga tuig.

Ang dya nga mga SSFs nagatuyo sa pagbulig sa mga magagmay nga negosyante nga mapanami pa gid ang andang proyekto kag mapanaba ang gastos.  

Ginhambal ni Legarda nga ang Antique ana ginakabig nga modelo sa pagpatuman kang programa sa mga MSMEs, SSF kag iba pa nga programa kang DTI.

Ginpasiguro na man nga ang pundo magapadayon lakip na ang Negosyo Center kag One-town-One Product.

Si Regional Director Rebecca Rascon nagpasalamat may kay Legarda sa padayon nga suporta sa mga programa kang DTI.

Ginpanugyan na man sa mga SSFs cooperators nga ang anda kooperasyon kinahanglanun para magmayad ang anda proyekto. Ginkomiter na man ang padayon nga suporta kang DTI sa pagpangita kang baraligyaan kang andang produkto. (JBG/PSM/PIA-Antique)

 



Source: Philippines Information Agency (pia.gov.ph)

Post a Comment

0 Comments