Kahimtang sa patigayon sa dakbayan sa Maasin anaa gihapoy pag-uswag bisan pa sa pandemya

MAASIN CITY, Feb.16 (PIA)  --  Ang mga nanglukat og mga special permit gikan sa Enero 1 hangtud Pebrero 9, 2020, mikabat og 518 ka buok.

Itandi kini sa samang panahon karong tuiga, gikan Enero 1 hangtud Pebrero 9, 2021, miabot og 839 ang nanglukat og special permits, misaka balig 161.97%.

Kini ang gitahu ni Imelda Bandibas, city treasurer, dihang nahinabi siya sa media briefing/kapihan sa PIA sa miaging semana.

Ang mga numero nagpakita lamang nga bisan pa sagisagubang karon nga covid-19 pandemic, nagpabiling hataas ang kompyansa sa mga buot mag negosyo sa siyudad.

Sa samang gitandi nga panahon, ang record sa treasurer’s office nagbutyag nga dihay 92 ka mga bag-ong nanglukat og mayor’s permit ug 89 ang sa karon, halos tupong-tupong lang.

Ang mga nang renew sa ilang mayor’s permit 749 ka buok sa miaging tuig apan karong tuiga milapas kini ngadto sa 857 ka buok, o may pagsaka nga 114.47%.

Giangkon hinuon sa mamahandi nga ang city economic enterprise, labina ang bus terminal, nakasinati gyod og pagkunhod sa kita gumikan sa travel restrictions, hasta na mga restaurants ug hotels.

Sa nahipos nga grand income, ubos usab ang sa 2021 itandi sa samang unang mga adlaw sa 2020, apan dili ra kaayo layo.

P 32 Million ang nakolektang local nga income sa unang mga adlaw sa 2020, ug P 25 Million karon sa unang mga adlaw sa 2021. (mmp/PIA8-Southern Leyte)



Source: Philippines Information Agency (pia.gov.ph)

Post a Comment

0 Comments