City Veterinarian nanawagan sa tanan pagtahu kon dunay dili talagsaon nga pagkamatay sa binuhing baboy

MAASIN CITY, February 18 (PIA) -- Ang tanang katawhan sa 70 ka mga barangay ning dakbayan sa Maasin giawhag nga mopahibawo sa buhatan sa city veterinary kon ugaling aduna silay namatikdan nga dili kasagaran mamatay og kalit ang ilang baboy nga gibuhi.

Kini ang gipahibawo ni Dr. Rey Alinsub, city veterinarian, aron padayong mabantayan ang presensiya sa sakit nga african swine fever (ASF) nga motakboy sa maong kahayopan.

Matud ni Alinsub nga ang ASF sama ra sa yano nga hog cholera diin ang sintomas naglakip sa pagpuwa-puwa sa panit ug hemorraheage nga mosangpot sa kamatayon.

Kinahanglan nga kuhaan og sampol ang baboy nga namatay ug ipadala sa laboratoryo aron pagsuta natakbuyan ba kini sa ASF, si Alinsub miingon diha sa media briefing/kapihan sa PIA interbyu.

Samtang sa nalambigit nga kalambuan, padayong nagtukaw ang mga kawani sa city veterinary office aron walay makasulod nga mga baboy o mga produkto gama sa karneng baboy nga dili kompleto ang mga papeles.

Kini agig pagsunod usab sa EO numero 5 nga gipirmahan ni Gov. Damian Mercado pagka Pebrero 5, diin gimando ang istriktong pag-usisa sa mga live pigs ug meat products aron malikayan ang pagkaylap sa ASF, dugang pasabot ni Dr. Alinsub. (mmp/PIA8-Southern Leyte)



Source: Philippines Information Agency (pia.gov.ph)

Post a Comment

0 Comments