Cebuano News: Oras sa pagparehistro, gi-uswag pa sa Comelec

TAGBILARAN CITY, Feb. 15 (PIA) -- Gi-uswag pa sa Commission on Elections (Comelec) ang oras sa voter registration isip pagpangandam sa Mayo 9, 2022 National ug Local Elections.

Sa gipagawas nga abiso sa Comelec, himuon na gikan alas 8 sa buntag taman alas 5 sa hapon ang pagparehistro sa mga bag-ong botante gikan sa adlaw nga Martes hangtod Sabado.

Magsugod kini karong adlawa, Pebrero 15, 2021.

Gawas niini, abli usab ang mga buhatan sa Comelec alang sa voter registration bisan holiday.

Samtang ipahigayon sa adlaw nga Biyernes hangtod Lunes ang disinfection sa mga buhatan sa Comelec mao nga sarado ang ilang mga buhatan sa tibuok nasod sa mga adlaw sa disinfection.

Base sa Election Records and Statistics Department (ERSD), may 1,339,346 ka aplikasyon ang giproseso sa tibuok nasod sa labing ulahing datos niadtong Pebrero 4.

Una nang miingon si Comelec Commissioner Rowena Guanzon nga wala pa sa upat ka milyong target ang mga bag-ong nagparehistrong botante.

Aron modaghan pa ang magparehistro, gi-uswag sa Comelec ang oras sa pagrehistro. (ecb/PIA7-Bohol)
 



Source: Philippines Information Agency (pia.gov.ph)

Post a Comment

0 Comments