Kinaray-a News: Mga negosyante nagkita kang masobra P1M sa Kapitolyo Market

SAN JOSE, Antique, Enero 8 (PIA) -- Masobra sa P1 milyon ang kita kang mga negosyante nga nagpakigbahin sa Kapitolyo Market nga ginhiwat angot sa Binirayan Festival 2020 rugya sa Antique.

Ginpahayag kang Provincial Information Office nga ang dya nga hirikuton nga ginpangunahan ni Governor Rhodora Cadiao may tinutuyo sa pagbulig sa mga Antiqueño nga nawad-an kang trabaho bangud sa pandemya.

Suno naman kay Juan Carlos Perlas, Provincial Tourism Officer In Charge, ginakabig ang Kapitolyo Market bilang sangka “incubator activity” kun sa diin gintipon ang mga Antiqueño kag ginalauman nga magbahol ang kinitaan kang mga magagmay nga mga negosyante.

Samtang, sa bahin ni Kevin Leigh Zulueta, sangka negosyante, nangin bahol ang andang kita tungod gin-libre kang gobyerno probinsyal ang andang tubig, elektrisidad, kag renta.

Sa pihak nga bahin, lima ka libo ka pesos naman ang ginbaydan kang mga negosyante para sa pagpatindog kang andang booth sa Kapitolyo Market.

Nagpasalamat man si Zulueta sa gobyerno probinsyal bangud sa kahigayunan nga makapakigbahin sa hirikuton.

Sa madumduman, nangin bukas sa publiko ang Kapitolyo Market nga kun sa diin dya ang nag-obserbar man kang mga standard health protocols.

Ginpakigbahin ni Perlas nga ang dya nga mga patakaran amo ang body temperature checking, pagsuksok kang face mask, pagpanubo kang operating hours halin 1:00 sa hapon tubtub 8:00 sa gab-i, kag pagtugro kang health clearance kang mga booth personnel.

Dugang pa, nagpamutang man kang mga plastic barriers sa mga food stalls kag lamesa sandig sa patakaran kang Municipal Health Office sa andang pagpangusisa sa Kapitolyo Market. (JSC/LML/PIA6 Antique)



Source: Philippines Information Agency (pia.gov.ph)

Post a Comment

0 Comments