E. Samar LGU nag-aandam na hin relief packs para han mga nabaha-an

BORONGAN CITY, Enero 13 (PIA) – Nagre-repack na hin relief packs in pipira nga empleyado han gobyerno probinsyal han Eastern Samar para han siyam nga bungto nga nahi-agom han danyos dara han babaha.

Hinunumduman nga haros tulo ka adlaw ini nga waray hunong nga uuran nga nagpabaha ha mga kairayahan han  Arteche, Jipapad, Oras, Sulat, Dolores, Maslog, Can-avid, Taft ngan Borongan.

Subay han Rainfall Warning, nagsarusaliwan la ha Red ngan Orange Rainfall Alert an iginpapasamwak han NDRRMC.

Ha pagkayana, diri pa kumpleto an datos ni  PDRRMO Josephine Titong han mga pamilya nga makarawat han gin-andam nga relief packs, komo padayon pa an ira pagkarawat han report tikang ha mga Municipal Disaster Risk Reduction Officers.

Padayon pa ngani an rapid assessment han agrikultura nga nadanyos ha mga iraya.

Mayda naman mga nahi-report nga nalumos nga hi Yanz Ravas, 4 anyos han maruba an ira sinasakyan nga pumpboat tikang ha Dolores tipakadto ha San Policarpo. Mayda gihapon mga nanhi-anod nga tawo ugaring, nasapod hin mga rescuer. Mayda gihapon usa nga parapangisda nga ginkilala nga hi Ronel Abayan han Dolores nga na-rescue ha bungto han Llorente.

Ha Brgy. Hindang, Borongan, hi Meyo Alea usa nga residente nga naghuhubang han iya tuna in nadat-ugan hin tono, ugaring dayon na-rescue.

Diri pa naaagian an Wright-Taft  Road dara hin tuno (landslide) ha Brgy. Binaloan, Taft ngan nagbabaha gihapon ha Brgy. Malinao, San Pablo, Mabuhay han Taft.

An iba naman nga kakalsadahan in talwas na agian, sugad han Borongan-Guiuan, Borongan-Arteche-Jipapad, ngan Borongan-Lawaan-Marabut-Basey han Samar.

Ginkakabarak-an naman han mga parauma an ira mga tanom nga humay nga posible diri na pagpulsan. Ha FB post ni Gov. Ben Evardone, nagsaad ini nga tatagan niya hin gahi (palay seeds) utro an mga parauma nga nadanyos an tanom dara han babaha. (nbq/PIA E. Samar)



Source: Philippines Information Agency (pia.gov.ph)

Post a Comment

0 Comments