Cebuano News: Temporaryo’ng travel ban sa mga gikan sa 22 ka nasud, gipatuman

TAGBILARAN CITY, Bohol, Jan. 5 (PIA) -- Temporaryo pa nga gidid-an ang pagpasulod sa mga foreign nationals ug mga byahedor nga gikan sa 21 ka mga nasud, ug gipaapil na gani ang gikan sa United States, sa pagpasulod sa Pilipinas sa labing uwahi nga lakang sa pagdepensa sa nasud batok sa bag-ong matang sa coronavirus disease.

Kahinumduman nga gisawhan sa mga balita ang bag-ong matang sa Severe Acute Respiratory Syndrome Novel Coronavirus Disease (SARS N-COV 2) nga giila nga B.1 1.7 o ang VUI 2020/12/01 nga una nga namatikdan didto sa United Kingdom (UK).

Tungod niini, niadtong Disyembre 29, gipagawas ni Executive Secretary Salvador Medialdia ang memorandum nga nagpatuman sa pagpugong sa pagbyahe pasulod sa Pilipinas kon gikan sa UK,  o kadtong gikan sa Denmark, Ireland, Japan, Australia, Israel, The Netherlands, Hongkong, Switzerland, France, Germany, Iceland, Lebanon, Italy, Singapore, Sweden, South Korea, South Africa, Canada, Spain, gikan sa Disyembre 31 hangtud sa Enero 15.

BASTA DILI LANG MOGAWAS SA AIRPORT. Bisan kon ming-agi sa nasud nga may kaso sa bag-ong variant sa COVID, basta dili mogawas sa airport ug makigsahug sa ubang tawo, mahimong dili na motiwas sa pugos nga 14 ka adlaw nga facility based quarantine inig abut sa nasud. Human sa negatibo nga resulta sa RT PCR pag-abut dinhi, mahimo na nga home quarantine na alang sa usa ka Pinoy o langyaw nga dili mismo naggikan sa nasud nga gitumbok nga may travel ban. (rahc/PIA-7/Bohol)

Hinuon, kadtong mga Pinoy nga manguli, bisan pa kon gikan sa mga nasampit nga nasud, makasulod pa gihapon, apan gikinihanglan sila nga ipailawom sa pugos nga facility-based nga 14 ka adlaw nga kwarantina bisan pa kon may ikapakita kini nga negatibo nga resulta sa kagaw gikan sa Reverse Transcription Polymerase Chain (RT-PCR).

Niining bag-o lamang, laing memorandum ang gipagawas sa Executive Secretary nga nagdugang sa mga nasud nga may travel ban paingon sa Pilipinas.

Niadtong Disyembre 31, giapil na ang Unites States sa mga nasud nga may travel restrictions sa Pilipinas.

Tungod niini, kadtong mga langyaw nga gikan sa US o nakabisita sa bisan hain man sa 21 ka mga nasud nga malista, pugngan una sa pagsulod sa Pilipinas sugod Enero 3  (alang sa USA) ug Enero 1 sa uban nga mga nasud.

Kadtong mga langyaw nga naggagikan sa US ug sa ubang nasud nga malista, kang kinsa nga pag-abut sa nasud nasulod sa 14 ka adlaw sa ilang paggikan sa US ug sa bisan hain man sa 21 ka nasud, ug nga nakasulod sa Pilipinas sa wala pa ang  ala una sa kaadlawon Enero 3, pwede pa nga makasulod.

Butyag hinuon sa Memorandum nga gipagawas niadong Enero 3, sila nga makasulod kinahanglan nga mopailawom sa way-hangyo nga 14 ka adlaw nga facility-based nga kwarantina sa ilang pagsulod, bisan pa kon kaya nila makapakita sa negatibo nga resulta sa RT PCR.

Hinuon usab, basta Pinoy, dili sila did-an sa pagsulod sa nasud bisan pa og gikan sila  sa US o sa mga nasud nga nalista apan mopailawon gayud sila sa way hangyo nga kwarantina sulod sa 14 ka adlaw sulod sa usa  ka facility-based quarantine bisan pa kon nagnegatibo na kini sila sa kagaw subay sa pagtesting pinaagi sa RT PCR.

Sa sitwasyon nga ang mosulod sa Pilipinas, nagagikan sa mga nasud nga wala sa listahan, apan molabay isip stop-over sa mga nasud nga apil sa travel ban, basta lang dili mogawas ug magpabilin lamang sulod sa airport ug walay pagtugot sa local nga immigration nga makasulod sa stop-over country, dili sila isipon nga gikan sa nasud nga dili makapasulod sa Pilipinas.

Niining sitwasyona, sa ilang pagsulod sa Pilipinas, mahimo nga dili na sila mokompleto sa 14 ka adlaw nga kwarantina, gani mahimo na nga mag home quarantine kon makapakita na sa negatibo nga resulta sa kagaw, pinaagi sa RT PCR. (rahc/PIA-7/Bohol)



Source: Philippines Information Agency (pia.gov.ph)

Post a Comment

0 Comments