Cebuano News: Pre-registration alang sa COVID-19 vaccine nagpadayon sa syudad sa Tagbilaran

Ang kagamhanang syudad sa Tagbilaran nipatik sa mga contact numbers matag barangay diin mahimong e-text sa mga lumolupyo sa syudad nga may edad 18 hangtod 59 anyos ang ilang pangalan, address ug gidaghanon sa mga miyembro sa pamilya nga interesadong magpabakuna batok COVID-19. (Tagbilaran City Government FB)

TAGBILARAN CITY, Jan. 20 (PIA) -- Nagpadayon karon ang pagpahigayon sa pre-registration alang sa mga interesadong magpabakuna batok sa COVID-19 sa syudad sa Tagbilaran.

Una nang gipahibalo sa kagamhanang syudad sa Tagbilaran nga human sa mga frontliners, senior citizens, ug persons with disability (PWD), isunod ang mga lumolupyo sa syudad nga may edad 18 hangtod 59 anyos.

Sa usa  ka Facebook post, giklaro na usab ni Mayor John Geesnell “Baba” Yap II nga dili pugson sa kagamhanang syudad ang tanan nga magpabakuna batok sa COVID-19.

Apan iyang gi-awhag ang mga frontliners ug senior citizens sa pagpahimos niining libreng bakuna.

Ang kagamhanang syudad nihatag og mga contact numbers matag barangay diin mahimong e-text sa mga lumolupyo sa syudad nga may edad 18 hangtod 59 anyos ang ilang pangalan, address ug gidaghanon sa mga miyembro sa pamilya nga interesadong magpabakuna.

Ang kagamhanang syudad sa Tagbilaran ang labing unang local government sa lalawigan sa Bohol nga nigahin og pondo alang sa COVID-19 vaccine.

Sa pagkakaron, Enero 20, 2021, ang syudad sa Tagbilaran adunay 10 ka aktibong kaso sa COVID-19 diin 4 niini ang local transmission ug 6 ang APOR. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments