Cebuano News: Mga ports of entry sa Bohol gi-alerto batok sa ASF 

TAGBILARAN CITY, Jan. 19 (PIA)--Gi-alerto ang mga ports of entry sa lalawigan sa Bohol human natala ang labing unang kaso sa African Swine Fever (ASF) sa Kabisay-an.

Gibutang sa kagamhanang probinsyal ug nagkalain-laing ahensya sa gobyerno ang mga kawani sa tanang pantalan sa lalawigan sa ‘heightened alert’ human natala ang labing unang kaso sa ASF sa tapad nga lalawigan sa Leyte.

NASANGONAN. Nasangonan si Provincial Veterinarian Dr. Stella Marie Lapiz sa gimbuhaton pagpanguna aron maungad ang hulga sa ASF nga mahimong motabok na sa Bohol, human kini makompurmar sa kalungsuran sa Leyte. Usa ka hugot nga pagbantay ang buot ipatuman sa kagamhanan sa tanan nga baybayon nga mahimong kadungguan sa mga karne o niluto nga karne sa baboy nga mahimong magdala sa sakit dinhi. (rahc/PIA-7/Bohol) 

Matud pa ni Provincial Veterinarian Dr. Stella Marie Lapiz nga ang presensya sa ASF sa duha  ka barangay sa Abuyog, Leyte nakumpirmar sa niaging semana nga nakapa-aghat sa Department of Agriculture (DA) sa pag-alerto sa mga silingang lalawigan sa Kabisay-an nga nagpabiling luwas sa ASF.

Si Lapiz nagkanayon nga ang lalawigan sa Bohol, pinaagi sa executive order nga gilagdaan ni Gob. Arthur Yap niadtong Biyernes, Enero 15, mipalapad sa ban sa pagsulod sa mga livestock transport vehicles, bisan kadtong mga walay sulod, gikan sa Leyte gawas pa ang gikan sa Mindanao ug Luzon.

“Atong karaan na pamaagi, pwede man mosulod ang ilang empty vehicle diri sa ato, unya ang atong mga baboy ug mga baka ikarga nato sa pantalan so dili sila kasuroy kutob ra pantalan para kargahan sa atong mga baboy, pero karon na naay outbreak sa Leyte dili na g’yud ta magpasud,” matud pa ni Lapiz.

Ang tanang sakyanan nga mosulod sa lalawigan bisan kadtong mga pribadong sakyanan kinahanglang ipaubos sa disinfection agi og paglikay sa pagsulod sa ASF ug COVID-19.

Gihugtan na usab ang monitoring sa mga kabaybayonan sa barangay agi og paglikay sa pagsulod sa mga produkto sa karneng baboy pinaagi sa pagsakay niini sa mga gagmay nga fishing boats.

“Ga lay down ta og schedule sa information campaign alang sa mga coastal barangay kay giingon g’yud ni governor na pahibaw-on ang mga taw, e-inform para makatabang sila kay dili ra man regular ports nato ang agian sa mga taw,” pasabot pa ni Lapiz.

Ang ASF usa  ka makatakod nga sakit sa mga baboy diin dili kini direktang makatakod sa mga tawo apan posible kining mapasa sa tawo ngadto sa baboy ang virus kun makakaon o makagunit og kontaminadong karne.

Aron makuhaan ang hulga sa ASF sa ubang lugar sa nasod, padayon pa gihapon ang mga ahensya sa gobyerno ug lokal nga kagamhanan aron dili mokatap pa ang maong virus. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments