Cebuano News: Matinud-anon nga drayber sa Cabadbaran hatagan insentibo

DAKBAYAN SA BUTUAN, Enero 12 -- Mamahimong exempted na sa mga bayrunon sa prankisa, permit, clearance, medical, regulatory fees ug makadawat pa og plaque of recognition ug libreng sticker ang si kinsa mang mga tricycle driver sa syudad sa Cabadbaran nga nagmatinud-on sa ilang pagtrabaho pinaagi sa pag-uli sa mga butang nga ilang nakit-an nga dili ila o butang nga nahabilin sa ilang sakyanan.
 
Kini mao ang unod sa Sanggunian Resolution No. 600-2020 nga nagdiklarang balido sa City Ordinance No. 2020-036 gikan sa lungsod sa Cabadbaran nga nagmando sa maong insentibo gipangamahanan ni Sangguniang Bayan Member Abner P. Caga-anan.
 
Ang maong award o insentibo ipadangat isip reward sa maong LGU nga ma-acknowledge ang maayong-buhat nga gipakita sa mga Cabadbaranon diin kini mamahimong tumdanan sa mga kabatan-onan.
 
Ang maong ordinansa gihimo aron mapasiugda sa syudad sa Cabadbaran ang aktibong partisipasyon ug madasig ang mga anaa sa sektor sa transportasyon sa pagtabang sa pagpalambo sa komunidad pinaagi sa pagsunod sa palisiya nga “Honesty is the best policy.”

Apan sa kinsa mang nakita nga anaa sa pagpanglimbong o fake “honesty act,” pagasilutan pinaagi sa pagkansela sa permiso aron mag-operate .
 
Ang pag-aproba giduso sa pagpangamahan ni Board Member James T. Reserva, tsirman sa Committee on Laws, Ethics and Good Government atol sa ika-70th sesyon regular sa SP. (SV Deligero, LGU Agusan del Norte/PIA Agusan del Norte)

 



Source: Philippines Information Agency (pia.gov.ph)

Post a Comment

0 Comments