Cebuano News: Gobyerno milagda og kasabotan sa pagkuha og 30M doses sa Covovax

MANILA, Jan. 11 (PIA) -- Ang gobyerno sa Pilipinas nga gi-representahan ni National Task Force (NTF) Against COVID-19 chief implementer ug vaccine czar Kalihim Carlito Galvez Jr., Serum Institute of India (SII) ug Faberco Life Sciences, Inc., milagda og kasabotan niadtong Enero 9, 2021 sa pagkuha og suplay sa 30 ka milyong dose sa   COVID-19 vaccine nga Covovax.

VACCINE CZAR. Girepresentahan ni Sec. Carlito Galvez ang kagamhanan sa nasud sa paglagda sa kasabutan tali sa duha ka mga dagkong kompanya sa bakuna batok sa COVID alang sa pagpalit sa nasud sa 30 ka milyon nga bakuna. (PIA)

“This is a significant milestone in relations between India and the Philippines. It shows that we don’t have to look far beyond Philippine shores to find friends who are willing to help each other out,” matud pa ni Kishore Hemlani, ang Founder sa Faberco Life Sciences Inc., ang SII partner sa Pilipinas, human sa paglagda nila ni Kalihim Galvez.

Ang SII, ang labing dako'ng vaccine manufacturer sa tibuok kalibotan, nagkig-partner sa  Novavax, usa  ka US-based biotechnology nga kompanya alang sa development ug commercialization sa Covovax nga bakuna.

Kining bakuna adunay recombinant coronavirus spike protein nanoparticle ug Novavax-patented Matrix-M nga pangtabang sa pagpaayo sa ‘immune response’ ug makapadasig sa taas nga lebel sa ‘neutralizing antibodies’. Ang Covovax naa na karon sa third-stage trials ug gipaabot nga ma-aprobahan aron magamit sa international regulators.

Matud pa ni Faberco Life Sciences Medical Director Dr. Luningning Villa nga ang bakuna gamiton sa 15 ka milyong kabos ug daling matakdan sa sakit nga mga Pilipino. Gitubyag usab niini nga ang maong bakuna stable sa 2°C ngadto sa 8°C, ang standard nga temperatura nga nahisulod sa ‘existing cold chain system’ sa Pilipinas, diin gitugot ang distribusyon niini sa pinakalayong mga barangay.

Ang kandidatong bakuna hugot nga gisusi karon sa nagkalain-laing lugar, age groups, mga grupong labing apektado sa COVID-19, apil na ang mga may HIV, ug ‘racial and ethnic minorities.’

Ang clinical trials maglakip sa kadaghanan sa populasyon nga mga 50,000 ka subjects aron pagseguro sa ‘extreme robust clinical data’ sa wala pa ang pag-uyon sa mga may kalabutang regulatory bodies nga naglakip sa World Health Organization (WHO).

Ang bakuna gipaubos sa initial phase sa clinical trials sa Australia, South Africa ug India. Ang phase-three trial kasamtangang gipahigayon sa UK nga adunay 15,000 ka subjects ug nagpadayon usab sa Estados Unidos ug Mexico nga may 30,000 usab ka subjects.

Ang presyo sa bakuna gipaabot nga ipagawas sa dili madugay tali sa gobyerno ug SII, diin gipaabot nga maghatag usab kini og epektibo, luwas ug baratong bakuna sa tibuok kalibotan sama sa mga niaging panahon. Ang SII usa  ka kasaligang supplier sa nagkalain-laing bakuna sa Pilipinas, ilabi na ang gigamit sa Expanded Program for Immunization sa gobyerno.

Ang Faberco Life Sciences, Inc., usa usab ka partner sa SII alang sa mga nag-unang programa sa bakuna sa nasod sama sa Inactivated Polio vaccine, Rotavirus vaccine, Pneumococcal Conjugate vaccine, gawas pa sa COVID-19 vaccine. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments