Cebuano News: DOLE, nipasidaan batok sa mga tanyag nga salapi ug trabaho sa social media

MANILA, Jan. 11 (PIA) -- Nipasidaan ang Department of Labor and Employment (DOLE) sa publiko batok sa mga nagtanyag og mga salapi ug pekeng trabaho sa social media.

Kalabot niini, gitambagan sa DOLE ang publiko nga batasanon ang pag-berepika una sa registration sa mga kompanyang nakapangalan sa Facebook page sa dili pa makig-transaksyon o mohatag og mga mahinungdanong impormasyon.

"Verify the registration of such companies with appropriate government agencies before engaging with them, especially in providing information," awhag pa sa DOLE.

Nipagawas og pasidaan ang buhatan human makadawat og reklamo batok sa kompanyang nagpailang Eternal Investment.

Matud pa sa DOLE, nang-awhag ang kompanya sa Facebook og mga mo-apil sa ilang kumpanya ug nag-assign pa kini og job positions o trabaho pinaagi sa voluntary o commission basis

Giingong apil sa gitanyag nga posisyon sa kompanya mao ang executives, managers ug graphic artists. 

Apan giingong wala gibayaran og sakto sa Eternal Investment ang mga kawani niini.

Gibutyag sa DOLE nga migawas sa ilang pakig-alayon sa Department of Trade and Industry (DTI) nga dili rehistradong negosyo ang Eternal Investment.

Matud pa nga wala usab narehistro ang maong kumpanya sa Securities and Exchange Commission (SEC).

Gisang-at na sa DOLE ang reklamo batok sa Eternal Investment ngadto sa SEC aron maimbestigahan kini. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments