Cebuano News: DepEd nipasidaan sa publiko batok sa donation scam

Gipasidan-an ang publiko sa Department of Education batok sa mga grupong nigamit sa pangalan sa ahensiya ug mga opisyal ug kawani niini aron mangayo og mga pinansiyal nga donasyon. (DepEd)

TAGBILARAN CITY, Jan. 11 (PIA)--Nipasidaan ang Department of Education (DepEd) sa publiko batok sa mga grupong nigamit sa pangalan sa ahensya ug mga opisyal ug kawani niini aron mangayo og mga pinansiyal nga donasyon.

Matud pa sa gipagawas nga public advisory sa DepEd, nakadawat sila og mga taho nga may mga nigamit sa pangalan sa ahensya, ni Kalihim Leonor Briones, ug uban pang opisyal sa ahensiya aron makapangayo og salapi.

Giingong may mga nisundog pa sa tingog ni Kalihim Briones sa pagpangayo og salapi.

"We would like to reiterate to the public that the Department has not authorized any individual or group to conduct such activity especially in the name of the Secretary," [Buot nato nga ipadayag sa publiko nga ang Department of Education wala magtugot sa ni bisan kinsa o bisan unsa nga pundok sa paghimo sa nahisgutang buluhaton ilabi na sa ngalan sa kalihim] segun pa sa DepED.  

Matud pa sa DepEd nga gipa-imbestigahan na nila kini sa tabang sa mga otoridad.

Gi-awhag sa ahensya ang publiko nga kun makasugat og mga kadudahang transaksyon sama niini, mahimo kini nilang ipahibalo sa DepEd Public Assistance ug Action Center pinaagi sa email address depedactioncenter@deped.gov.ph o motawag sa mga numero (02) 8636-1663 ug  (02) 8633-1942. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments