Aklanon News: Gobyerno it Aklan indi eon mag-isyu it probationary QR code

KALIBO, Aklan, Enero. 29 (PIA6) – Indi eon mag-isyu it probationary Quick Response (QR) codes ro probinsyal nga panggobyerno it Aklan sa mga turista nga nagaplano nga magbisita sa Isla it Boracay.

Hara nga tikang hay ginhimo it gobyerno it Aklan pagkatapos nga maabo eon nga nadakpan nga mga turista dahil sa pagpresentar it peke nga negatibo nga resulta it reverse transcription polymerase chain reaction (RT-PCR).

Ro iba hay nadakpan sa Caticlan Airport samtang ro iba hay nakasueod eot-a it isla ag naka "check-in" eon sa mga hotel.

Suno kay Caticlan Jetty Port Administrator Atty. Selwyn Ibaretta ro Aklan Validation Team hay naga-isyu it probationary QR codes sa mga turista pero iga-validate pa ro anda nga coronavirus disease 2019 (COVID-19) test sa accredited molecular laboratory centers.

Raya hay para makasakay eagi ro mga turista sa eroplano/barko samtang nagahueat ro probinsya sa  sabat it laboratory center.

Ginpunto ni Ibaretta nga tungod sa nasambit nga panloko, ginpundo insigida it probinsya ro pag-isyu it temporaryo nga QR code ag ginpayuhan ro mga turista nga magsekyur it anda nga Online Health Declaration Card indi magnubo sa 24 oras bago ro anda nga pag-eupad o pagbyahe para maiwasan ro delay sa pagtao it QR Code..

Gindugang pa ni Ibarreta nga ro validation team it probinsya hay mapaguwa eamang it QR code kung may kumpirmasyon eon halin sa molecular laboratory.

Ginreport ni Povincial Health Officer I Dr. Cornelio Cuachon Jr., nga tatlo sa an-om nga nadakpan nga mga turista kunduraya eang dahil sa peke nga resulta it anda nga RT-PCR test ro nagpositibo sa COVID-19.

Ro tatlo nga kaso kay gin-inbolbaran it daywa ka babayi ag sambilog nga eaki nga  insigida man nga ginbutang sa pasilidad ag pribado nga hotel sa Kalibo, Aklan bilang parte it mandatory quarantine protocol.

Samtang, kunduraya eang hay ginlunsar it Malay Municipal Tourism Office ro 24/7 Boracay Tourist Information Hotline nga handum nga mabuligan ro mga turista it Boracay, kaparehas sa anda nga mga travel requirement, proseso sa pagsueod sa Boracay, ano ro pwede ubrahon sa isla, ag siin ro mayad nga agtunan sa isla.

Ro mga turista nga sa planning stage ag ro mga naka-check-in eon nga mga bisita sa Boracay hay pwede ma-access ro hotline number nga: 09682431919 para Smart subscribers, ag 09274392343 para mat-a sa Globe users. (JSC/SQP/PIA6 Aklan)

 

 



Source: Philippines Information Agency (pia.gov.ph)

Post a Comment

0 Comments