Gabay sa pagbuo ng ortograpiya ng mga wika ng Filipinas, nilimbag ng KWF, DepEd

LUNGSOD CALOOCAN, Dis. 7 (PIA) -- Mayroong nalikhang gabay ang Komisyon ng Wikang Filipino (KWF) para sa pagbuo ng ortograpiya ng mga wika ng Filipinas.

Ayon sa KWF, ang pagbuo ng mga ortograpiya ng mga wika ng Filipinas ay pagtupad ng ahensya sa mandato nito  hinggil sa pagpapayaman, pagtataguyod, at pangangalaga ng mga wika ng Filipinas.

Sa mga nakalipas na taon, sa pakikipagtulungan sa Kagawaran ng Edukasyon (DepEd) at mga organisasyon, ito ang mga ortograpiyang nailimbag ng KWF:

·      Ortograpiya ni Ibaloy,

·      Bayung Ortograpiyang Kapampangan,

·      Ortograpiya na Kinamayu,

·      Ortograpiya ni Kalanguya,

·      Ortograpiya han Waray,

·      Ortograpiya ti Pagsasao nga Ilokano,

·      Ortograpiya na Salitan Pangasinan,

·      Ortografiya na Gaddang,

·      Ortograpiya ya Malaweg,

·      Ortograpiya di KankanaĆ«y, at

·      Ortograpiya Itawit.

Hangad ng KWF na sa pamamagitan ng gabay na ito, mabigyan ng impormasyon ang mga dibisyon ng DepEd at mga organisasyon na nais maging katuwang ang KWF sa pagbuo ng kanilang ortograpiya.

Magugunitang ang ortograpiya ay isang manwal o gabay na naglalaman ng mga alituntunin sa pagsulat ng mga salita na may tumpak na titik alinsunod sa wastong gamit o wastong baybay o ispeling.

Para sa mga tanong at iba pang impormasyon, maaaring ipadala ang inyong mensahe sa kwf.ssg@gmail.com. (PIA NCR)



Source: Philippines Information Agency (pia.gov.ph)

Post a Comment

0 Comments