Cebuano News: 'Oplan ligtas biktima sa kalamidad at sakuna' gi-establisar sa Las Nieves

DAKBAYAN SA BUTUAN, Disyembre 15 -- Pinaagi sa Municipal Ordinance No. 477-2019 sa Sangguninang Bayan sa lungsod sa Las Nieves, ning lalawigan, nga gipangamahanan ni SB Member Jacinto T. Fabro, naestablisar na ang “Oplan Ligtas Biktima sa Kalamidad at Sakuna,” programa nga mosiguro nga adunay pundong andam panahon sa kalamidad ug uban pang panghitabo sa lungsod.

Ang programa nga parte sa Disaster Risk and Management Program sa Municipal Disaster Risk Reduction & Management Office sa lungsod sa Las Nieves, naggahin og usa ka milyon ka pesos (P1M) isip response funds sa munisipyo panahon sa kalamidad o katalagman diin 77% niini alang sa logistical requirement, samtang 23% giandam alang sa mga responders.

Kini nahisubay sa mandato sa R.A. 10121 o ang Philippine Disaster Risk Reduction and Management Act of 2010 diin gihatagag kagahom ang matag LGU sa nasod nga maghimog lakang ug mga pamaagi dili lamang isip pagpangandam, kundi pagrespondi usab sa epekto sa bisan unsang kalamidad o katalagman sama sa baha, linog ug uban pa.

Ang lungsod sa Las Nieves nailang usa sa mga lugar sa probinsya nga dali bahaon panahon sa kusog nga ulan, partikular ang 14 niini ka barangay nga duol sa Agusan River.

Gideklarang balido sa Sangguniang Panlalawigan ang diin unod ang programang “Oplan Ligtas Biktima sa Kalaminad at Sakuna” pinaagi sa Sanggunian Resolution No. 531-2020 sa rekomindasyon ni Bokal Benjamin D. Lim, Jr., tsirman sa SP Committee on Disaster Risk Reduction & Management. (JV Demain, LGU Agusan del Norte/PIA Agusan del Norte)



Source: Philippines Information Agency (pia.gov.ph)

Post a Comment

0 Comments