Cebuano News: Mga Bol-anon, dili 'kuno' magpabakuna batok sa COVID, segun sa radio survey

TAGBILARAN CITY, Bohol, Dec. 11 (PIA) -- Ilawom sa landong sa kawalay tino nga kasayuran kabahin sa gipasangil nga palpak nga vaccine trails sa usa  ka bakuna batok sa dengue, daghan pang Bol-anon nga miingon nga dili magpabakuna kon ugaling moabut na ang nadiskobre nga bakuna batok sa coronavirus disease (COVID), segun sa usa  ka radio survey sa mi-aging semana.  

Kini bisan pa sa pasalig sa World Health Organization (WHO) ang mga bakuna gipaagi sa makuti nga pagtesting alang sa pag-ila kon kini luwas ba, sa dili pa kini makapasar sa pagaprobar, ug ipagamit na sa usa  ka nasud.

Dinhi, mga batid nga doctor ug mga siyentipiko nga nagtamud gayud sa estrikto nga international nga mga batakan ang maghukom kon ang bakuna aprobahan ba o dili, dason sa WHO, kabahin sa pagpanghatag ug pagpang-apod-apod na sa bakuna sa tibuok kalibutan.

"Dili mahimo ang bakuna batok sa COVID nga adto lang himoon sa balay, kay ang paghimog bakuna, teknikal nga proseso nga maglambigit sa halapad ug moderno nga laboratoryo sundan sa clinical trials nga maglakip sa pagsuway sa bakuna ngadto sa libo-an ka mga tawo," matud pa sa WHO.

Gipasabut sa WHO nga ang clinical trials sa mga bakuna, magpalakip sa daghang tawo, subay sa kinsa kadtong mga moboluntaryo nga magagikan usab sa nag kadaiya nga nga lugar sa kalibutan, nagkadaiya nga kadugo, racial ug ethnic backgrounds, edad ug gender, lakip na kadtong may mga gipangbati na nga sakit nga nagpahimutang kanila sa mas taas nga risgo sa COVID.

Kini magseguro nga ang bakuna, luwas ug epektibo alang sa tanan, segun pa sa mga eksperto sa WHO.

Kini nga Clinical Testing mosunod kon ang bakuna nga nakaplagan, aprobahan na sa mga doctor ug mga siyentipiko nga mga eksperto.

Apan, dugang sa WHO, sama sa mga aprobado nga tambal, ang bakuna mahimong may mga side effects nga mabati sa pipila ka mga tawo, apan kini, gipasalig  sa mga tinugyanan nga kining mga side effects minor lamang og dili magdugay, o hangtud nga ang lawas maka-ila na sa gipasulod nga kagaw nga maoy makig-away sa sakit.

Pasalig usab sa WHO, mas daku ang kadaut nga ikapadangat sa sakit kay sa epekto sa bakuna.

Sa mi-aging semana, sa usa  ka radio survey, daghang nanawag sa radio ang mipadayag sa ilang kasibut nga mobalibad kuno sa bakuna, ang rason tataw nga nga dala sa kawalay tino nga kasayuran ug kakuwang sa pagpaningkamot nga masayud.  

"Ang walay siyentipiko nga kapasikaran nga kahadlok, timaan usab sa kawalay pagpaningkamot nga masayud," saway usab sa usa  ka mananambal, kinsa midugang nga bukas na ang internet aron makahimo og panukiduki ang tawo, apan nagsalig pa gihapon nga hungitan sa sayop nga kasayuran,

Ang mananambal, nga dili ganahan nga magpa-ila, midugang pagpahayag, “tan-awon lang nato kon tinuod ba nga dili magpabakuna, kon maghuot na ang dughan kon magrabehan sa COVID.”

Dugang niya, ang gibati nga, “dagway og gipatungan og usa  ka sako nga bugas ang dughan ug gibaatan ang ilong sa baga nga noog, dungan sa hutoy nga hilabihan, kana maoy bati-on sa mga magka COVID nga magrabehan.” (rahchiu/PIA-7/Bohol)

 



Source: Philippines Information Agency (pia.gov.ph)

Post a Comment

0 Comments