Cebuano news: 160 ka pamilya midawat sa “Pangkabuhayan Kits” sa DTI

VALENCIA CITY, Disyembre 17 (PIA)—Si Assistant Secretary Reveree Niño Contreras sa Department of Trade and Industry (DTI) uban kang Northern Mindanao regional director Linda Boniao ug Bukidnon provincial director Eriberto Taban-ud Jr, bag-ohay lang mi-apod-apod sa kapin P545,000 nga kantidad sa mga ‘livelihood starter kits’ ngadto sa 160 ka mga pamilyang benepisyaryo sa mga kabarangayan sa syudad sa Valencia.

Ubos sa programang "Pangkabuhayan sa Pagbangon at Ginhawa kon PPG, lakip sa nakadawat mao ang gikan sa mga barangay sa Tugaya, Laligan, Guinoyuran, Banlag, Concepcion, ug Barobo, tanan sakop sa Valencia City.

Ang nahisgutan nga mga livelhood starter kit gilangkuban sa Organic Vegetable Gardening, Banana Chips Processing, ug Motorcycle Shop Starter Kit.

Tungod ini, gidasig ni Mayor Azucena P. Huervas ang mga benepisyaryo nga gamiton ug sakto ang gihatag sa DTI aron mapaayo ang pamaagi sa ilang pagpuyo ug mahupay ang kawad-on.

"Dako kaayo akong kalipay karong adlawa. Mapasalamaton ko sa DTI, sa atong Senador Bong Go, ug kang President Rodrigo Duterte. Dako kaayo ni nga tabang alang sa dugang panginabuhi-an sa atong mga kaigso-onan. Alang kaninyong mga benepisyaryo, maka abag-abag gyod ni sa inyo. Kung dili ninyo ni gamiton, ang programa sa atong gobyerno ug ang panglantaw sa atong gobyerno ma-usik lang. Busa gi-encourage gyud nako kamo nga inyong gamiton kining gihatag sa inyo. Useless ang gibuhat sa gobyerno kung dili ninyo gamiton sa saktong pamaagi. Nanghina-ut ko nga sa sunod nga pagbisita nila dinhi kanato, naa nay positive impact ug maayong feedback gikan kaninyo," miingon si mayor Huervas.

Sa iyang pakigpulong, gi-awhag usab ni DTI-10 Regional Director Linda Boniao ang mga benepisyaryo sa PPG nga magpadayon sa ilang nasugdan hangtud molambo ang ilang panginabuhi-an.

"It is my hope, ang akong pag-ampo nga kining among gihatag karon sa inyo, makatabang gyud sa inyong panginabuhi-an. Umpisa pa lang kini aron mo-ginhawa ang inyong panginabuhi," matud pa ni Boniao.

Sa iyang mensahe, si Asec. Contreras miingon nga ang DTI nag-apod-apod sa mga “Pangkabuhayan Kits” sugod pa niadtong Hunyo ning tuig nga gipundohan sa opisina ni Senador Bong Go.

"Kini nga programa dili ni molambo kung wala mo kauban sa mga ‘beneficiaries’. Busa nia ko karon aron tan-awon ug segurohon nga ang tabang sa gobyerno mo-abot gyod sa inyo. Hangyo lang nako ug panghina-ut nga unta puhon, sa giingon pa ni Mayor Huervas, nga makita namo ang positibo nga feedback gikan sa inyo," dugang ni Asec. Contreras. (BGEpan/PIA Bukidnon)



Source: Philippines Information Agency (pia.gov.ph)

Post a Comment

0 Comments