Cebuano News: Sukwahi sa unang gipahibalo, wala'y paghunong sa pagpangdawat sa mga APOR, LSIs sa Tagbilaran

TAGBILARAN CITY, Nov. 16 (PIA) -- Duha  ka adlaw human unang gipahibalo sa lokal nga kagamhanan sa syudad sa Tagbilaran nga temporaryong ihunong ang pagpangdawat sa mga authorized persons outside residence (APORs) ug locally stranded individuals (LSIs), si Tagbilaran Mayor John Geesnell “Baba” Yap II mi-klaro nga dili kadto usa  ka opisyal nga announcement.

Si Yap, sa iyang opisyal nga Facebook page niadtong Nobyembre 13 mi-klaro nga mangdawat pa sila “non-stop” og mga APOR ug LSIs bisan sa Christmas break.

MANAWAT GIHAPON BISAN SA PASKO. Tungod kay ang Pasko ang panahon nga tingtapok sa pamilya, nahukman sa syudad nga manawat pa gihapon sila sa mga LSI ug APOR bisan pag gitambagan na nila nga ipahiluna ang mga pag-uli nga dili matanggong sa kwarantina inig adlaw mismo sa Pasko, matud ni City Mayor John Geesnell  Yap II. (rahc/PIABohol file foto)

“But they are apprised to schedule their travels properly if they want to be out of the quarantine facility before Christmas,” (Hinuon, gipahibaw na sila aron mapahiluna ang tyempo sa ilang mga byahe, kun buot sila nakagawas na sa quarantine facility sa dili pa mag Pasko), pasabot pa ni Yap sa iyang FB post.

Gidugang sa mayor nga gi-konsiderar usab nila ang pagdugang og mga quarantine facilities aron makadawat pa sila og dugang nga mga mamauling Tagbilaranons.

“Maningkamot ta para maka dugang ta ug free quarantine facility sa buwan sa December para mas daghan pa maka avail pero mag inform pod mi daan nga basin naa pa jud ghapon dli makaya tungod sa ka daghan,” pasabot pa sa mayor.

Kahinumdoman nga una nang nag-post sa ilang Facebook page ang Tagbilaran City DRRM Office ug Tagbilaran City Radio Program niini nga temporaryong ihunong una ang pagpangdawat sa mga APORs ug LSIs.

Kini matod pa aron mahatagan og igong panahon sa kagamhanang syudad sa pagpahigayon og pagpaayo ilabi na sa mga libreng pasilidad ug maghatag usab kini og kahigayonan sa mga health workers ug front liners sa ilang gikinahanglang pahulay.

Samtang gipasabot usab og balik ni Yap nga ang syudad sa Tagbilaran dili parte sa “travel bubble” mao nga walay turista nga makanaog sa syudad.

“Klarohon nato nga once mu ari ang tourist, naa na silay fixed nga itinerary ug tour package, subject sa guidelines para sa mga tourists. Wala na gapasabot nga gi paboran ang tourista kaysa sa mga residente. Di pod nato pwede wad-on ang quarantine para sa mga LSI, APOR ug ROF diri sa Tagbilaran kay importante ni nga safeguard nga naka tabang nato ug control sa number of covid cases,” pasabot pa sa mayor sa iyang FB post.

Sukad niadtong Biyernes, Nobyembre 13, may 3,443 ka Tagbilaranons ang namauli sa ilang panimalay. May kinatibuk-ang 1,739 ka LSIs, 1,156 ka overseas Filipino workers (OFWs) ug 548 ka APORs. (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments