Cebuano News: Lima na lang ka kaso sa locally transmitted COVID-19 sa Bohol, Nob. 24

29 NA LANG GYUD. Apan mas makalipay sa mga taga Bohol ang 5 na lamang ka kaso sa locally transmitted COVID gikan sa mingkapin na gani sa 40 ka kaso pila ka buwan ang milabay.  (PIA Bohol)

CORTES, Bohol, Nov. 24 (PIA) -- Lima na lang ang kaso sa Corona virus disease (COVID) nga natakdan sa mga ania na dinhi o locally transmitted, kini maoy kasayuran nga  gipaambit sa Bohol Inter-Agency Task Force (BIATF) niining bag-o lamang.

Kini nga kalambu-an, human nakompirmar nga ang 10 ka kaso sa isla sa Maomawan sa Bien Unido, nagnegatibo na, segun pa sa Task Force nga nagdumala sa mga bag-ong nisulbong nga mga sakit nga mananakod, dinhi sa Bohol.  

Dungan usab niini, napakunhod na sa Bohol ngadto sa 29 ang iyang kaso sa mga nagpositibo sa nahisgutang sakit, Nobyembre 24, 2020.

Sa lima ka kaso nga locally transmitted, tulo niini ang sa Talibon, usa sa Calape ug lain nga usa sa Candijay.

Nobyembre 24 usab diha nga mingsaka ngadto sa 24 ang nagpositibo sa hanay sa mga nanguli nga locally stranded individuals (LSI) ug Overseas Filipino Workers (OFW) nga gidawat sa Bohol aron makaipon sa ilang mga banay, ug mga Authorized Persons Outside Residence (APOR) nga gitugotan nga makatabok sa Bohol sa opisyal nga mga tuyo.

Sa mga LSI, natala ang tulo ka kaso sa Candijay, duha ka kaso sa Alicia, duha sa Tubigon, usa sa Trinidad, usa sa Tagbilaran, usa sa Antequera, ug usa sa Ubay.

Napun-an pa kini sa 12 ka APOR sa Camp Lino Chatto sa Tubigon ug usa pa sa Candijay.

Sa bag-ong kasayuran, minglabyog na usab ngadto sa Bohol District 2 ang dungog sa malampuson nga pagseguro nga mamenosan na nila ang ilang mga kaso pinaagi sa calibrated nga pagpapauli sa mga LSI, mga OFW ug ang gidumala nga pagpasulod sa mga APORS.  

Kahinumduman nga nga pipila ka adlaw ang minglabay, ang District 3 sa Bohol may natala nga unom lamang ka kaso, apan karon, ang District 2 ang may lima na lamang ka kaso samtang napun-an og usab ang sa District 3, ngadto na sa pito ka kaso.

Sa District 1, may natala nga 17 ka kaso: 14 sa Tubigon, usa sa Calape, usa sa Antequera 5 ug usa sa Tagbilaran. (rahc/PIA-7/Bohol)



Source: Philippines Information Agency (pia.gov.ph)

Post a Comment

0 Comments