Hiligaynon News: Masobra 3,500 ka mga mangunguma, mangingisda sa nakabaton loan assistance sa DA 

SYUDAD SANG ILOILO, Oktubre 8 (PIA) - - Masobra sa 3,500 ka mga magagmay nga mangunguma kag mangingisda sa Nakatungdan Bisayas nga naapektuhan sang coronavirus disease 2019 (COVID-19) ang nakabenipisyo sang loan assistance nagikan sa Department of Agriculture - Agricultural Credit Policy Council (DA-ACPC).

Ginpahayag ni Assistant Secretary Jonji Gonzales sang Office of the Presidential Assistant for Visayas nga nakapagwa ang DA- ACPC sang ₱96.53 milyon nga kabilugan nga pautang sa mga benepisyaryo sa idalum sang Expanded Survival and Recovery Assistance (SURE) COVID-19 program tubtub sini nga Septyembre.

“Ang tagsa ka benepisyaryo ang nakakuha sang ₱25,000.00 nga loan nga mahimo mabayaran tubtub 10 ka tuig,” siling ni Gonzales sa iya report sa tion sang Laging Handa Network Briefing sang Miyerkules, Oktubre 7.

Nakapaguwa ang ACPC sang ₱24.9 milyon sa Aklan, ₱11.8 milyon sa Antique, ₱9.8 milyon sa Capiz, ₱1.8 milyon sa Guimaras, ₱25 milyon sa Iloilo kag ₱15 milyon sa Negros Occidental.

Magluwas sa loan assistance sa mga indibidwal nga mangunguma, gindugang ni Gonzales nga ang SURE COVID-19 credit program nagatanyag man sang loan assistance sang tubtob ₱10 milyon sa mga micro and small enterprises (MSEs) nga yara sa agri-fishery production kag trading.

Pila sa mga nakabaton sang loan sa probinsya sang Aklan amo ang Integrated Barangays of Numancia Multi-Purpose Cooperative nga nagbaton sang P10 milyon nga loan kag Lezo MPC nga nagbaton sang P5 ka milyon nga loan.

Sa Antique, ang Kalipunan ng mga Magsasaka ng Patnongon nakakuha sang isa ka milyon nga loan para sa ila negosyo nga rice trading kag agricultural supply.

Sa Iloilo, ang YLD-IISDA sang banwa sang Concepcion nakahulam sang 5 ka milyon ka pesos samtang sa probinsya sang Negros Occidental, ang Negros Island Organic Producers Association nakabaton sang 3.5 milyon ka pesos nga credit support nagikan sa ACPC.

Ginpahayag ni Gonzales nga suno sa ACPC, may yara nga P69.9-million loan application para sa MSEs pending for approval kag P37 milyon nga balor sang loan application nga yara pa sa idalum sang evaluation.

Ang SURE COVID-19 program isa lamang sa tatlo ka credit facilities nga ginatanyag sang DA-ACPC sa mga target nga benepisyaryo nga zero-interest kag wala sang collateral. Iban pa nga loaning program amo ang Kapital Access for Young Agripreneurs (KAYA) kag ang Agri-Negosyo (ANYO). (JBG/laf/PIA6-Iloilo) 



Source: Philippines Information Agency (pia.gov.ph)

Post a Comment

0 Comments