Cebuano News: DSWD, magdugang og mga bag-ong benepisyaryo sa 4Ps

TAGBILARAN CITY, Oct. 9 (PIA) -- Ang Department of Social Welfare and Development (DSWD) magdugang og mga bag-ong benepisyaryo ubos sa Pantawid Pamilyang Pilipino Program (4Ps).

Alang sa rehiyon sa Central Visayas, may kinatibuk-ang 6,670 households ang gi-target nga ma-enrol sa programa sa katapusan ning tuig.

Sa pagkakaron, adunay 279,943 ka household beneficiaries sa rehiyon.

Ang mga bag-ong benepisyaryo ipule sa mga benepisyaryo nga nigawas na ug kadtong pagawas na gikan sa maong programa.

Ang DSWD Field Office VII nagsugod na sa ilang validation process sa mga potensyal nga benepisyaryo sa 4Ps ug nagpadayon pa kini hangtod karon. Ang master list sa mga potesyal nga benepisyaryo sa 4Ps gipaskil sa mga dali malantaw nga lugar sama sa mga barangay halls ug municipal halls.

Ang listahan sa mga potensyal nga benepisyaryo naggikan sa Listahanan database, nga nakabase usab sa resulta sa second round sa household assessment niadtong tuig 2015.

Gawas sa giila isip kabos gikan sa Listahanan, ang usa  ka Pantawid household beneficiary kinahanglang may anak nga nagpangedaron og 0-18 anyos o buntis nga miyembro sa panahon sa pagpahigayon sa assessment ug andam nga mosunod sa mga kundisyon sa programa isip parte sa ilang ‘co-responsibilities.’

Ang DSWD mi-awhag sa publiko sa pag-validate sa master list aron maseguro nga mga kwalipikadong benepisyaryo lamang ang maapil sa maong programa. Ang proseso sa balidasyon ipahigayon pinaagi sa community assembly o sa  house-to-house visit.

Samtang ang mga lugar sa rehiyon sa Central Visayas nga gipaubos pa sa modified general community quarantine (MGCQ), ang validation ug registration mosunod sa estriktong minimum health standards sama sa pagsul-ob og face masks ug face shields, pag-sanitize sa mga kamot ug pag-obserbar sa physical distancing sa pagpahigayon sa community assembly.

Ang  4Ps usa  ka programa sa nasudnong kagamhanan nga mamuhunan sa kahimsog, nutrisyon ug edukasyon sa mga kabos nga pamilya ilabi na sa mga bata nga may edad 18 anyos paubos.

Gi-implementar kini sa DSWD kauban sa Department of Health (DOH) ug sa Department of Education (DepEd).

Ang kwalipikadong pamilya hatagan og tabang pinansyal bugti sa pagsunod sa kondisyon sa programa.

Naglakip kini sa school attendance nga dili moubos sa 85% matag buwan alang sa mga bata nga ma-enrol sa pre-school, elementarya o sekondarya; mga batang may edad 5 anyos paubos nga kinahanglang ipaubos sa preventive check-up nga gi-mandato sa DOH; mga batang ma-enrol sa elementarya makadawat og deworming pills ikaduha sulod sa school year; ang mga buntis makadawat og pre ug post-natal care base sa DOH protocol; ug ang mga ginikanan o guardians kinahanglang motambong sa binuwan nga Family Development Session (FDS).  (ecb/PIA7-Bohol)



Source: Philippines Information Agency (pia.gov.ph)

Post a Comment

0 Comments